အိမ်က လူကြီးတစ်ယောက်ယောက်က မီးဖိုချောင်မှာသုံးတဲ့ ဓားမကိုယူပြီး အုန်းသီးခွဲနေတာတွေ့ရင် မယောင်မလည်နဲ့ အနီးအနားမှာ ရစ်သီရစ်သီလုပ်နေတတ်တယ်။ အုန်းသီးကို ကိုယ်တိုင်မခွဲတတ်ခင်ကပေါ့။ အခုလည်း ကျွမ်းကျွမ်းကျင်ကျင် မရှိသေးဘူး။ ဒါမျိုးဆိုတာက လေ့ကျင့်ပါများမှ လက်ယဉ်လာတာမျိုး။ အုန်းရည်အရသာချိုချိုလေးကို ကြိုက်တတ်ကြတာ ကလေးဘ၀ကတည်းကပဲ။ အုန်းရည်သောက်ရမယ်ဆိုတဲ့အသိနဲ့ အုန်းရည်ထည့်ဖို့ ခွက်ကြီးကြီးတောင် အသင့်ယူထားပြီး ဘေးနားမှာ မတ်တပ်ရပ်စောင့်နေတတ်တယ်။
"အား ချိုသွားတာပဲ" ဆိုရင် ခွက်ကို ကမ်းတဲ့လက်တွေ များတယ်။ "ဟေး မသောက်နဲ့ မသောက်နဲ့ ချဉ်စုတ်နေတာပဲ" ဆိုရင် ထပြေးကြတာများတယ်။
ချိုသွားတာပဲလို့ ပြောတဲ့အခါ ဒုတိယသောက်ခွင့်ရတဲ့သူက အုန်းရည်ခွက်ကို စကိုင်တယ်။ အဲဒီအခါ အဖေက တားတယ်။
"ဟေ့ကောင် နေဦး၊ ရော့ ဒါအရင်သောက်" ဆိုပြီး ခွက်တစ်ခွက် လှမ်းပေးတယ်။ ပေးတာကို ယူပြီး ဘာမှ မစဉ်းစားဘဲ သောက်လိုက်ပြီးမှ "အင် ဒါ သောက်ရေပဲ" လို့ပြောတဲ့အခါ "ရပြီ အုန်းရည်ကို တစ်ငုံသောက်" လို့ဆိုပြန်တယ်။ ပြီးတော့မေးတယ်
"ဘယ်လိုလဲ အရသာ"
"ချိုတယ်"
"ကဲ နောက်တစ်ယောက် ... အုန်းရည်မသောက်ခင် ဒါလေးသောက်ကြ"
ကျန်သူတွေလည်း အုန်းရည်မသောက်ခင်မှာ သောက်ရေကို အာဆွတ် လျှာဆွတ်ရုံလောက်သောက်ကြရတယ်။
ဘာကြောင့် ရေအရင်သောက်ရတာလည်းလို့ မေးတာကို အဖေက အဖြေမပေးပါဘူး။ ဒါက ငယ်ငယ်တုန်းကပါ။ ကြီးလာတဲ့အခါမှာလည်း အုန်းရည်သောက်ချင်လွန်းအားကြီးပြီး ရေမသောက်မိဘဲ အုန်းရည်ကို သောက်ဖို့ပြင်တဲ့အခါ အဖေက "ဟေ့ကောင် ... ဟိုဟာလေး သွားသောက်လိုက်ဦး" လို့ ပြောပါတယ်။
အဲဒီအခါ ခပ်မြန်မြန်လေး ပြေးသွားရပါတယ်။ သောက်ရေအိုးရှိတဲ့နေရာဖြစ်ဖြစ်၊ သောက်ရေရှိတဲ့နေရာဖြစ်ဖြစ်ကိုပေါ့။ သောက်ပြီးမှ အုန်းရည်ကို တမော့မော့ပါတယ်။
နောက်ပိုင်း အုန်းရည်သောက်မယ်ပြင်တဲ့အခါ သောက်ရေကို အရင်သောက်တဲ့အကျင့်ဖြစ်သွားတယ်။ သူများတွေကိုလည်း ရေအရင်သောက်ဖို့ တိုက်တွန်းဖြစ်တယ်။
ဘာကြောင့် ရေကို အရင်သောက်ရသလဲဆိုတာသိချင်သပဆိုရင် ကိုယ်တိုင်စမ်းသပ်ကြည့်ဖို့ ပြောပါရစေ။
အုန်းသီးတစ်လုံး၀ယ်ချင်ရင်၀ယ်၊ ဒါမှမဟုတ် အသင့်သောက်ဖို့ စီမံပေးထားတဲ့ အုန်းရည်ကို ၀ယ်ချင်၀ယ်၊ ပြီးရင် ရေအရင်သောက်ပြီးမှ အုန်းရည်ကို သောက်ကြည့်ပေါ့။
အဲဒီအခါ ရေရဲ့ အသုံးကျပုံကို လက်တွေ့သိရပါလိမ့်မယ်။
ရေရဲ့ အသုံးကျပုံတွေကတော့ အများကြီးပါ။
ကျော်မောင်(တိုင်းတာရေး)
၁၆-သြဂုတ်-၁၆
(မှတ်ချက် ။ ။ ရေရဲ့ အသုံးဝင်ပုံက ပြောမကုန်နိုင် ရေးမကုန်နိုင်ပါဘူး။ ဟိုက်ဒရိုဂျင်နှစ်ဆ အောက်ဆီဂျင်တဆ ဆိုတာမှတ်လိုက်ကတည်းက စပြီးလည်ပါတယ်။ တစုံတယောက် တစုံတခုရဲ့ အသုံးဝင်ပုံကို သိချင်တဲ့အခါ အဲဒါမရှိရင် ဘာဖြစ်နိုင်မလဲ ဆိုတာကနေ တွေးကြည့်ပါ)
၁၆-ဩဂုတ်-၂၀၂၃
No comments:
Post a Comment