သတင်းတို တပုဒ် ဖတ်ကြည့်ခြင်း

သတင်းက အတိုလေးပဲ။

ဂျပန်မှာ ဖြစ်နေကြမဟုတ်ဘဲ ပူနွေးလာတာကို အသိပေးတဲ့သတင်း။ ခေါင်းစဉ်က "အပြာရောင်မိုးကောင်းကင်များနဲ့ နေရောင်ခြည်တို့ ဂျပန်နိုင်ငံရဲ့ အဓိကကျွန်းကြီးကို မိုးထားခြင်း" လို့ အဓိပ္ပါယ်ရမလားပဲ။

ခေါင်းစဉ်မှာပါတဲ့ ဂျပန်နိုင်ငံရဲ့ အဓိကကျွန်းကြီးဆိုတာ ဘယ်ကျွန်းလဲ။ ဂျပန်မှာ အဓိကကျွန်းလေးကျွန်းရှိတယ်။ အဲဒီထဲမှာ အကြီးဆုံးကျွန်းက (Honshu) ဟွန်ရှူးကျွန်းပဲ။ မြို့တော်တိုကျိုက အဲဒီကျွန်းကြီးပေါ်မှာ ရှိတယ်။ ဒါက ခေါင်းစဉ်ကနေ ရလာနိုင်တဲ့ သူတို့နိုင်ငံရဲ့ အကြောင်းအနည်းငယ်ပဲ။ ငယ်ငယ်က လေ့လာခဲ့လည်း ဆက်လက်မလေ့လာတဲ့အခါ မေ့ကုန်တာပါပဲ။ လေးကျွန်းရှိတာတို့၊ အကြီးဆုံးကျွန်းဆိုတာတို့၊ ဟွန်ရှူးဆိုတာတို့က အင်တာနက်ကနေ ပြန်ဖော်ရတာ။

မတ်လလယ်၊ တိတိကျကျပြောရရင် မတ်လ ၁၄ ရက်နေ့မှာ တိုကျိုမြို့ရဲ့ Shibuya Ward မှာ လမ်းသွားလမ်းလာတွေဟာ သူတို့ရဲ့ကုတ်အကျီီတွေကို မဝတ်ဘဲ လက်နဲ့သယ်လာ၊ ပွေ့လာကြပါတယ်။ လက်တိုတီရှပ်တွေကိုပဲ ဝတ်ဆင်ကြတယ်လို့ ဆိုပါတယ်။ အနွေးထည်တွေ ကုတ်အကျီတွေ မဝတ်ရလောက်အောင်ဆိုတော့ ဒါဟာ အအေးလျော့လာလို့ပဲလို့ သတင်းဖတ်သူက စစချင်းမှာပဲ တွေးမိပါလိမ့်မယ်။ Shibuya Ward ဆိုတာကို မသိဘူး။

ကဲ အပူချိန်ဘယ်လောက်ရှိလဲဆိုတာ ဆက်လက်ဖတ်ရှုကြည့်ရအောင်။

ရာသီချိန်မဟုတ်ပါဘဲနဲ့ ပူနွေးမှုဟာ ဂျပန်နိုင်ငံတဝန်းလုံးကို ပျံနှံ့နေပြီး မတ်လ ၁၄ ရက်နေ့မှာတော့ မြို့တော်တိုကျိုအနီးတဝိုက်မှာ အပူချိန် ၂၀ ဒီဂရီအမြင့်ဆုံးဖြစ်နေပါတယ်။ အဲဒီအပူချိန်တွေဟာ ခါတိုင်းလိုဆိုပါက ဧပြီလအထိ မခံစားရတဲ့ အပူချိန်တွေပဲ ဖြစ်ကြပါတယ်လို့ သတင်းက ရေးပါတယ်။

ဒီအထိ ခါတိုင်း ဒီလိုလတွေမှာ အပူချိန်ဘယ်လောက်ရှိကြသလဲဆိုတာ မဖော်ပြထားသေးပါဘူး။ ဒါပေမဲ့ သတင်းဖတ်သူက ခန့်မှန်းမိနိုင်တာမှာ အပူချိန် ၂၀ ဒီဂရီလောက်ကို ဧပြီလလောက်မှာမှ ရကြမှာ ဖြစ်တယ်ဆိုတာပါပဲ။ ပုံမှန်အပူချိန်ဟာ ၂၀ အောက်လျော့တယ်ဆိုတာ တွေးမိနိုင်ပါတယ်။

ဆက်ဖတ်ပါတယ်။

ဂျပန်မိုးလေဝသအေဂျင်စီတဲ့။ ဘာကြောင့်များ ဂျပန်မိုးလေဝသဌာနလို့ မခေါ်တာပါလိမ့်။ Agency ဆိုတဲ့ အသုံးအနှုန်းနဲ့ Department ဆိုတဲ့ အသုံးအနှုန်း ဘာတွေ ကွာလို့ပါလိမ့်လို့ စူးစမ်းချင်စိတ်ဖြစ်လာမိတယ်။ ဒါက နောက်ဆက်လေ့လာရမယ့်အပိုင်းပဲ။ စိတ်ထဲမှတ်ထားလိုက်တယ်။

တိုကျိုမြို့တဝိုက်အနီး ဧရိယာဝန်းကျင်မှာ ရှိတဲ့ မာကျူရီတွေကို ကြည့်ရာမှာ ၊ အဲဒီမှာ သတင်းထဲ အချိန်ထည့်ပေးထားတယ်၊ နေ့ခင်းပိုင်း ၁ နာရီတဲ့၊ အဲဒီ နေ့ခင်း တနာရီ တိုင်းတာချက်အရ တိုကျိုမြို့လယ်မှာရှိတာ ၂၀.၇ ဒီဂရီ၊ ယိုကိုဟားမားမှာတော့ ၂၀.၂ ဒီဂရီ၊ Maebashi မှာတော့ ၂၃.၅ ဒီဂရီတဲ့။

မာကျူရီ ဆိုတဲ့အသုံးလေး။ ဘာလဲ မာကျူရီ mercury ဆိုတာ။ အပူချိန်လို့ ရိုးရိုးမပြောဘဲ မာကျူရီလို့ ပြောရတာလဲ။ မာကျူရီဟာ လောလောဆယ်ဆယ်မှာ အပူချိန်ပတ်သက်လို့ မှန်မှန်ကန်ကန်ပြနေတဲ့ သတ္တုပဲ။ တနည်းပြောရရင် အဲဒီ အဲဒီမြို့တွေမှာ ရလာတဲ့ အပူချိန်ဒီဂရီ ကိန်းဂဏန်းတွေသည် အပူချိန်သုံးရာမှာ ပထမတန်းစားလို့ ပြောလို့ရတဲ့ မာကျူရီရဲ့အပူချိန်ကို ကြည့်ပြီး ပြောတာ။ အစပိုင်းမှာ ၂၀ ဒီဂရီ ရှိတယ်လို့ ပြောထားရာကနေ ၂၀.၇၊ ၂၀.၂၊ ၂၃.၅ ဒီဂရီဆိုတာမျိုး ပြောလာတယ်။ ဒါ မာကျူရီအစွမ်းဖြစ်မှာပဲ။ သူက ၀.၁ ဒီဂရီထိ ဖော်ပြနိုင်တဲ့ အစွမ်းရှိပုံရတယ်။ ဒီသဘောသက်ရောက်တဲ့အတွက်ကြောင့်လည်း သူ့ကို သုံးတာ ဖြစ်ပါလိမ့်မယ်။

အဲဒီအပိုင်းမှာပါတဲ့ Maebashi ။ အသံထွက်နားထောင်ကြည့်တော့ "မ အေး ဘရှီ" လို့ ကြားပါတယ်။ အသံထွက်ရေးတာ လွဲကောင်းလွဲနေလိမ့်မယ်၊ အဲဒီမြို့ကို မရင်းနှီးပါ။ တိုကျိုတို့ ယိုကိုဟားမားတို့ကိုတော့ ကြားဖူးနားဝရှိထားတယ်။ "မ အေး ဘရှီမြို့" ဘယ်နားမှာလဲ သိချင်တဲ့အတွက် အင်တာနက်မှာ ရှာကြည့်လိုက်တယ်။ မြို့ရဲ့ ပုံမှန်ရှိတတ်တဲ့ အပူချိန်ဖြစ်နိုင်တယ် ၁၇ ဒီဂရီလို့ ပြထားတယ်။ အခု ပြန်ရှာကြည့်တော့ ၁၄ ဒီဂရီလို့ ပြထားတယ်။ အပူချိန်တက်လာတဲ့အခါ သူ့ဆီမှာ အဲ သူ့မြို့က ပြဒါးတိုင်မှာ ၂၃.၅ ဒီဂရီလောက် ရှိနေတယ်။ မနေ့က အပူချိန်တက်သွားတာ။ အခုကတော့ ပြန်ကျသွားပုံပဲ။ သူက တိုကျိုထက် ပိုပြီး ကုန်းတွင်းပိုင်းပိုကျတယ်။

ပူနွေးတဲ့လေတွေကလည်း အရှေ့ဘက်ကနေ လေဖိအားမြင့်တက်လာမှုကြောင့် ဂျပန်ကုန်းတွင်းပိုင်းကို တိုက်ခတ်လျက်ရှိတယ်တဲ့။ ဂျပန်ရဲ့အရှေ့ဘက်မှာ ဘာရှိလဲ။

သတင်းနောက်ဆုံးပိတ်အနေနဲ့ ရေးထားတာက ဒီလို။ အခုလို နွေဦးကာလကဲ့သို့ ရာသီဥတုမျိုးဟာ မတ်လ ၁၅ ရက်နေ့အထိ ဆက်လက်ဖြစ်ပေါ်နေမယ်လို့ ခန့်မှန်းကြပါသတဲ့။

အဲဒီမှာ သတင်းဖတ်သူဟာ အနည်းငယ်တော့ ဝေဝေ၀ါးဝါးဖြစ်သွားပါတယ်။ အပူချိန်တက်လာတဲ့ နေ့ကို ဖော်ပြထားတာက မတ်လ ၁၄ ရက်နေ့ဖြစ်ပြီး မတ်လ ၁၅ ရက်နေ့အထိ ဖြစ်နေဦးမယ်ဆိုတော့ တစ်ရက်လောက်ပဲ ဖြစ်မယ့်ကိစ္စကို သတင်းအနေနဲ့ ဖော်ပြထားတာကိုက ထူးဆန်းနေမလားပါပဲ။

ထူးဆန်းလို့လဲ သတင်းတိုအနေနဲ့ ဖတ်ရတာပဲ မဟုတ်လား။

သတင်းတပုဒ် ဖတ်ကြည့်တာပါ။ အတိုလေးဖြစ်ပေမယ့် မသိတာတွေ သိလာရတယ်။ ထပ်သိအောင် လေ့လာရမှာတွေ ရှိတယ်ဆိုတာ သိသွားတယ်။ ကမ္ဘာတဝှမ်းမှာ အပူချိန်တွေ ဒီဂရီ နည်းနည်း နည်းနည်းချင်း တိုးလာတယ်။

သတင်းဖတ်အပြီးမှာ ပူသလိုလို အိုက်သလိုလိုတော့ ခံစားရခြင်း မဖြစ်လိုက်ရပါဘူး။

ကျော်မောင်(တိုင်းတာရေး)
၁၅-မတ်-၂၀၁၈
မှတ်ချက် ။ ။ http://www.asahi.com/ajw/articles/AJ201803140034.html
ဒါက အဲဒီသတင်းတိုပါ။

မသုံးသေးတဲ့အခါ

ဓာတ်ခဲတွေ အကြောင်းဖြစ်ပါတယ်။ ဓာတ်ခဲဆိုတာမျိုးက လျှပ်စစ်ပစ္စည်းတွေနဲ့ ကင်းလို့မရ။ ဓာတ်မီး၊ နာရီ၊ ကလေးကစားစရာမှသည် တိုင်းတာရေးကိရိယာတွေဖြစ်တဲ့ အထွေထွေသုံးမီတာတိုင်းစက်တို့၊ သွေးပေါင်ချိန်တိုင်းကိရိယာတို့ စသည်တွေမှာ သုံးကြတာ။

ဓာတ်ခဲသုံးတဲ့ ပစ္စည်းအတော်များများမှာ ဖြစ်တတ်တဲ့ သဘောသဘာဝက ပစ္စည်းအသစ်ဝယ်လာတဲ့အခါ ဓာတ်ခဲထည့်ပြီး စမ်းသပ်လေ့ရှိကြတယ်။ သုံးလို့ အဆင်ပြေ မပြေ၊ တချို့တွေကြပြန်တော့လည်း တခြားသူတွေကို ကြွားချင်ဝါချင်တဲ့အတွက် ဓာတ်ခဲထည့်ပြီး သုံးပြကြတာ။ အဲဒီလို ပထမဆုံး အသုံးပြုလို့ ပြီးတဲ့အခါ နောက်လည်း သုံးမှာပါပဲလေဆိုပြီး ဓာတ်ခဲကို ပြန်မထုတ်တော့ဘဲ ပစ္စည်းထဲမှာပဲ ထည့်ထားလိုက်လေ့ရှိတာပါပဲ။

နောက် အသုံးလိုလို့ ဒါမှမဟုတ် သတိရမိလို့ သုံးမယ်ဆိုပြီး အဲဒီပစ္စည်းတွေကို ဖွင့်တဲ့အခါ ဖွင့်မရတတ်တာတွေဖြစ်တတ်ပါတယ်။ ဓာတ်ခဲလည်း ထည့်ထားပြီးသားပဲ ပစ္စည်းကလည်း အသစ်နီးပါး၊ တခါပဲ သုံးရသေးတာပဲလို့ ထင်တတ်ကြပါတယ်။

ဓာတ်ခဲထည့်ထားတဲ့နေရာကို စစ်ကြည့်မိမှပဲ ဆားတွေပေါက်နေတဲ့ ဓာတ်ခဲကို တွေ့တတ်ကြတာပါပဲ။ တချို့ပစ္စည်းတွေမှာဆို ဓာတ်ခဲဆားပေါက်တာကနေတဆင့် ဓာတ်ခဲထည့်တဲ့ နေရာတွေမှာတောင် ဆားပေါက်တာဖြစ်သွားပြီး အဲဒီကနေတဆင့် တခြားအပိုင်းတွေဘက်ကိုပါ ဆိုးကျိုးရစေပါတယ်။

ဒါဟာ ဘာကို ပြသလဲဆိုတော့ သုံးမှာပဲ ထည့်ထားလည်း ဘာမှမဖြစ်နိုင်ဘူးဆိုတာကနေ စတာပါပဲ။ မသုံးမိဘဲ ချောင်ထိုးထားတဲ့အခါ ဓာတ်ခဲဆားပေါက်တာနဲ့ တိုးတာပါပဲ။

အဲဒါကြောင့် မသုံးသေးတဲ့အခါ ဓာတ်ခဲလိုပစ္စည်းမျိုးဟာ အပြင်မှာ ထုတ်ထားတာပဲ သင့်တော်ပါတယ်ဟု ယူဆပါကြောင်း။

ကျော်မောင်(တိုင်းတာရေး)

၇-ဇူလိုင်-၂၀၁၇

သတင်းတစ်ပုဒ်မှသည်

ငါးရိုးစူးတဲ့တိုက်လို့ အမည်ရတဲ့ တိုက်ထဲက နိုင်ငံတစ်နိုင်ငံဟာ နောင်နှစ်ပေါင်း တစ်ဆယ့်သုံးနှစ်လောက်မှာ ထမင်းဆီဆမ်း တောင်းလို့ရတဲ့ နေရာဆီကို လူလိုက်ပါတဲ့ ယာဉ်ပျံ လွှတ်တင်မယ်လို့ အဲဒီနိုင်ငံရဲ့ မိုးကောင်ကင်လွန်ရပ်ဝန်းဒေသဆိုင်ရာ အေဂျင်စီက ဆိုတယ်။

အဲဒီနေရာရဲ့ တောင်ဘက်စွန်းမှာ ရေပဲဖြစ်ဖြစ် ရေခဲပဲဖြစ်ဖြစ် ရှိလား မရှိလားဆိုတာ သွားပြီးစပ်စုချင်လို့ ဆိုပဲ။ ဘာကြောင့် ဒီလောက်တောင်ပဲ ရေကို တမ်းတရသလဲဆိုတာ သူ့မှာအကြောင်းတွေ ရှိသေးတယ်။ ရေကို လောင်စာဆီအဖြစ်သုံးလို့ရအောင် ဆောင်ရွက်နေတဲ့ နည်းပညာကို တည်ဆောက်မလို့လို့ဆိုတယ်။

အခုကတော့ ထမင်းဆီဆမ်းကို လူကိုယ်တိုင်သွားတောင်းမယ်လို့ပဲ မှတ်ထားရအောင် ပြောတာဖြစ်ပါတယ်တဲ့။

နောင်နှစ်ပေါင်း ၁၃ နှစ်ဆိုတာ အခု ၂၀၁၇ ကို ၁၃ နဲ့ တွက်စက်မှာ ထည့်ပေါင်းကြည့်တော့၂၀၃၀ ရတယ်။ အဲဒီ ၂၀၃၀ ခုနှစ်မှာ လုပ်မယ့် အစီအမံ။ ဒါကို ဖွင့်ချပြတာ။ ဘာလို့ ဖုံးထားတာကို ဖွင့်ချရသလဲဆိုရင် အမှန်က ဘယ်တုန်းကတည်းက ကြိတ်လုပ်နေမှန်း မသိ၊ ကြိတ်လုပ်နေတာတော့ မဟုတ်ဘူး၊ သတင်းမှာ ပါတဲ့ အဲဒီ မိုးကောင်းကင်လွန်ရပ်ဝန်းဒေသဆိုင်ရာ အေဂျင်စီရဲ့ အင်တာနက်စာမျက်နှာသွားကြည့်တဲ့အခါ အလွန့်အလွန်ကို များပြားလှတဲ့ သူတို့ရဲ့ လုပ်ငန်းဆောင်တာတွေကို ပထမဆုံးအနေနဲ့ လေ့လာခွင့်ရခဲ့တာပါပဲ။ အရင်က မသိခဲ့ဘဲ ဒီသတင်းလေးရလို့ လိုက်ရင်းကနေ သိရတဲ့ စာမျက်နှာပဲ ဖြစ်ပါတယ်။

ဖွင့်ချရတဲ့ အဖြစ်ရောက်သွားတဲ့အကြောင်းတွေက ဒီလိုတဲ့။

ပထမအကြောင်းက ရုပ်ရှင်ကားတွေမှာ အတွင်းအားတွေ ကိုယ်ဖော့ပညာရပ်တွေ အသုံးများတဲ့ နိုင်ငံက၊ သူလည်း ငါးရိုးစူးတဲ့တိုက်ကြီးထဲက နိုင်ငံပဲ။ လာမယ့် ၂၀၂၀ မှာ အင်္ဂါဂြိုလ်ပေါ်ကို စပ်စုယာဉ်လွှတ်တင်မယ်လို့ ကြေငြာထားတာရှိတယ်။ ၂၀၂၀ ဆိုတော့ လာမယ့် သုံးနှစ်ဆိုရောက်တော့မှာပဲ။ အတော်နီးနေပြီ။

နောက်ဒုတိယအကြောင်းက ရုပ်ရှင်ကားတွေမှာပဲ သီချင်းဆိုတာ ကတာတွေ အများကြီး သုံးတတ်တဲ့ နိုင်ငံက၊ ဒါလည်း အဲဒီတိုက်ကြီးထဲကပဲ၊ ၂၀၁၈ နှစ်ရဲ့ ပထမခြောက်လအတွင်းမှာ ဒုတိယအကြိမ်အဖြစ် ထမင်းဆီဆမ်းသွားယူမလို့ လုပ်နေတယ်လို့ ကြုံးဝါးထားတာရှိပြန်တယ်။ သူက ပိုလို့တောင် နီးနေပြန်သေး။

ဒီလိုအကြောင်းတွေကြောင့် သူတို့ဟာ ဒီသတင်းကို ဖွလိုက်ရခြင်း အဲလေ ဖွင့်ချလိုက်ရခြင်းပဲဖြစ်တယ်လို့ သတင်းတချို့က ရေးသားကြတယ်။

ဘာပဲပြောပြော အဲဒီ ပထမအကြောင်းထဲက တိုင်းပြည်နဲ့ ဒုတိယအကြောင်းထဲက တိုင်းပြည်တွေဟာ တိုင်းပြည်တစ်ပြည်နဲ့ နယ်နမိတ်ထိစပ်နေတယ်။

၂၀၃၀ မှာ ဘာလုပ်မယ် ညာလုပ်မယ်ပြောတဲ့ တိုင်းပြည်ကလည်း အဲဒီတိုင်းပြည်တစ်ပြည်ဆိုတာကို တခါတုန်းက အလည်လာရောက်ဖူးတဲ့ နောက်ကြောင်းလေးတွေ ရှိခဲ့တယ်။

နောက်ဆုံးကောက်ချက်အနေနဲ့ကတော့ အဲဒီလို တမြေတည်းရှိပြီး ထိစပ်နေတဲ့အတွက် အဲဒီတိုင်းပြည်နှစ်ပြည်နဲ့ ၊ မိတ်ဆွေဖြစ်လိုက် ရန်သူဖြစ်လိုက် ပြန်ပြီးမိတ်ဆွေဖြစ်လိုက်လို့ ပြောလို့ရတဲ့ အစကပြောတဲ့ ၂၀၃၀ မှာ ရေသွားရှာမယ်ဆိုတဲ့ တိုင်းပြည်တွေဟာ ထမင်းဆီဆမ်းသွားတောင်းဖို့ စိတ်ကူးတွေ ရသွားခဲ့တာပဲ ဖြစ်ပါတယ်။

ဆိုခဲ့တဲ့ တိုင်းပြည်တစ်ပြည်ရဲ့ ကလေးအဖေတစ်ယောက်က ကဗျာလေး စပ်ဆိုလိုက်တယ်။ သူက သူ့သမီးလေးကို ချော့သိပ်ရင်း ဟိုး ကောင်းကင်ပေါ်က အဝိုင်းကြီးကို ပြရင်းနဲ့ပေါ့။

"ကောင်းကင်က အမှောင်ထဲမှာ ပိုလှပါတယ်။ 

ကြယ်တွေက ညရောက်မှ ပိုမို တောက်ပပါတယ်။

ဆန်ဖွပ်တဲ့သူကလည်း သူ့ဘာသာသူ ဆန်နာနာ ဖွပ်နေပါတယ်။

ယုန်ကလေးကလည်း အနားမှာ အေးအေးဆေးဆေး ဝပ်လို့နေပါတယ်။

ကဲ သမီးရေ ... 

မော့ကြည့်လိုက်စမ်းပါ 

တနေ့တော့ အဖေတို့လည်း 

အဲဒီကို ရောက်ရမယ်ကွယ့်

ရောက်ရမယ်"

ကျော်မောင်(တိုင်းတာရေး)

၄-ဇူလိုင်-၂၀၁၇

တုံ့ပြန်မှုများဖြင့် ညှိယူခြင်း

System ဆိုတဲ့ အတုံးလေးက စပါမယ်။ အတုံးလေးကို ဝင်လာတာက System input တွေပေါ့။ အဲဒီ Input တွေက System အတုံးလေးထဲမှာ တခုခုအလုပ်လုပ်ပြီး ပြန်ထွက်လာတဲ့အခါ System output တွေရတယ်။ ဆိုတဲ့အခါ စနစ်တခုထဲမှာ၊ စနစ်တခုလို့ ပြောရင် အဝင်ရှိမယ်၊ အထွက်ရှိမယ်၊ အထွက်သည် လုပ်ငန်းတခုခုလုပ်ဆောင်ပြီးမှ ဖြစ်လာတာဖြစ်လို့ အဝင်နဲ့အထွက်နဲ့ တူချင်မှ တူမယ်လို့ မတွက်ကောင်းပါ။ တူချင်လည်း တူပါလိမ့်မယ်။

ဟာသပြောရရင် အိမ်မကြီးတံခါးဆိုတာကို ကြည့်ရအောင်ပါ။ အိမ်ထဲကို ဝင်မလို့ အဲဒီအိမ်မှာနေတဲ့ လူတယောက်ဟာ အိမ်အပြင်ကနေ တံခါးရှေ့ရောက်လာတယ်။ သူက တံခါးဆိုတဲ့ စနစ်တခုကို ဖြတ်ကျော်ပြီးမှ အိမ်ထဲဝင်လို့ရမယ်။ တံခါးကို သော့နဲ့ဖွင့်ဝင်တာပဲဖြစ်ဖြစ်၊ တွန်းဝင်တာပဲဖြစ်ဖြစ်၊ အိမ်ထဲကနေ တယောက်ယောက်က ဖွင့်ပေးတာပဲဖြစ်ဖြစ်၊ အဲဒီတံခါးကနေ သူဝင်လာမယ်။ အဲဒီအခါ အဝင်ကလည်း သူပဲ၊ တံခါးကို ဖြတ်ကျော်ပြီးတဲ့အခါမှာလည်း သူပဲ။ ဒီလူဟာ မပြောင်းသွားဘူး။ လူမပြောင်းပေမယ့်လို့ သူ့ရဲ့ တည်နေရာဟာ ပြောင်းသွားတယ်။ တံခါးအပြင်ဘက် အိမ်အပြင်ဘက်ဆိုတာနဲ့ တံခါးကိုဖြတ်အပြီး အိမ်အထဲဆိုတာပဲ။ ဒါဟာ တံခါးဆိုတဲ့စနစ်တခုရဲ့ လုပ်ဆောင်ချက်တွေထဲက တခုပဲဖြစ်ပါတယ်။ ဒါတောင် လုံခြုံရေးဆိုတာတို့၊ အကာအရံဆိုတာတို့စတဲ့ လုပ်ငန်းဆောင်တာတွေ မပါသေးပါဘူး။

မျက်လှည့်ဆရာတယောက် မျက်လှည့်ပြတဲ့အခါ သူ့လက်ထဲက အရာတခုခုကို အဝတ်စတခုဖုံးအုပ်လိုက်ပြီး ဖွင့်ပြလိုက်တာကို ကြည့်ဖူးကြပါလိမ့်မယ်။ ဖွင့်ပြတဲ့အခါမှာ အဝတ်စ မဖုံးခင်က အရာပဲဖြစ်နေတယ်ဆိုရင် ဒါဟာ ပထမအကြိမ်ဖြစ်ရင် မျက်လှည့်ဆရာ ဟာသလုပ်တယ်လို့ပဲ မြင်ပါလိမ့်မယ်။ ဒုတိယအကြိမ်မှာ အဲဒီအရာဟာ အဝတ်မဖုံးခင်ကအတိုင်း ရှိမနေတော့ဘဲ အခြားအရာတစ်ခု ဖြစ်သွားဖို့ ပွဲကြည့်သူတွေက မျှော်လင့်ကြ၊ အဲဒီအတိုင်းဖြစ်လာတဲ့အခါမှာ လက်ခုပ်တီးအားပေးကြပါတော့တယ်။

System ဆိုတဲ့ စနစ်တခုထဲကို ဝင်သွားရင် ထွက်လာတဲ့ ရလဒ်ဟာ ပြောင်းကို ပြောင်းသွားရမယ်လို့ မှတ်ယူထားကြတဲ့အတွက် မပြောင်းသွားဘူးဆိုရင် ဒါဟာ ကောင်းတဲ့စနစ်မဟုတ်ဘူး၊ တချို့ဆိုရင် ဒါဟာ စနစ်လို့ ပြောလို့မရဘူးလို့ မှတ်ယူကောင်း မှတ်ယူကြပါလိမ့်မယ်။

ဆိုတဲ့အခါ စနစ်တခုရှိရင် အဝင် အထွက် ရှိမယ်လို့ ခဏမှတ်ကြတာပေါ့။ စနစ်တခုကို ဖြတ်သန်းလာတဲ့ အဝင်ဆိုတဲ့အပိုင်းဟာ အထွက်မှာ လိုချင်တဲ့ ရလဒ်မရသေးဘူးဆိုရင် ဘာလုပ်ကြမလဲဆိုတာ နောက်ပိုင်းမှာ စဉ်းစားလာကြပါတယ်။ ရချင်တဲ့ ရလဒ်ကို မရသေးရင် စနစ်မှာ အပြစ်ရှိလို့ဆိုပြီး စနစ်ကို ပြင်တယ်။ စနစ်ကို အကြိမ်ပေါင်းများစွာ ပြင်လိုက်၊ လိုချင်တဲ့ ရလဒ်မရလိုက်၊ ထပ်ပြင်လိုက်နဲ့ ဒါနဲ့ပဲ လည်နေတဲ့အခါ တမျိုးစဉ်းစားလာကြပြန်ပါတယ်။

အဲဒါက အဝင် ဆိုတဲ့အပိုင်းကရော မှန်ကန်ပါရဲ့လားဆိုတာပါပဲ။

သော့ခတ်ထားတဲ့ တံခါးကိုပဲ ပြန်သွားကြတာပေါ့။ တံခါးရဲ့ စနစ်တခုမှာ သော့ပေါက်ထဲ သော့ထည့်ပြီး ဖွင့်မှ တံခါးပွင့်မယ်ဆိုပါစို့။ သော့ထည့်ပြီး ဖွင့်လို့ မရဘူးဆိုရင် တံခါးသော့ပျက်နေပြီဆိုပြီး ပထမတွေးကြမှာပေါ့။ ဒါက အပေါ်မှာ ပြောထားတဲ့ စနစ်မှာ အပြစ်ရှိလို့ဆိုတဲ့သဘောပဲ။

တခါတလေမှာ အမှန်တကယ်ပဲ စနစ်မှာ အပြစ်ရှိတဲ့အတွက် ပြင်လိုက်တဲ့အခါ အဆင်ပြေသွားတာတွေ ရှိကြတယ်။ ဒါပေမဲ့ စနစ်က မမှားနိုင်ဘူးလို့ ယုံကြည်စိတ်ချရတဲ့အခါ အဝင် အပိုင်းကို ပြန်လည်သုံးသပ်ကြတယ်။ သော့ပေါက်ထဲထည့်ပြီးလှည့်တဲ့ သော့ဟာ အဲဒီတံခါးအတွက် သုံးရမယ့် သော့ဟုတ်ပါရဲ့လားဆိုတာ တွေးမိရမယ်။ အဲဒီမှာ ဟုတ်မယ်လို့ ထင်တဲ့ သော့တွေ တချောင်းပြီးတချောင်းရွေးရပါတော့တယ်။ တံခါးရဲ့ အလုပ်က သူ့ရဲ့သော့ပေါက်ထဲကို ဝင်လာတဲ့ သော့တွေထဲက မှန်ကန်တဲ့သော့ဖြစ်မှပဲ ပွင့်စေဆိုတဲ့အလုပ်ကို လုပ်ပေးတယ်။ သော့မှားရင် မပွင့်ပေးဘူး။

သော့တွေ တချောင်းပြီး တချောင်းရွေးရတယ်ဆိုတာက တံခါးကနေ မဖွင့်ပေးဘူးကွာ ဆိုတဲ့ တု့ံပြန်မှုကို ရလို့ပါပဲ။ ရလာတဲ့ရလဒ်သည် လိုချင်တဲ့ဟာ မဖြစ်သေးဘူးလို့ဆိုတဲ့အခါ အဝင်အပိုင်းကို ပြန်ညှိယူရတယ်။ အဲဒီအတွက် Sensor ဆိုတာကို ထည့်လိုက်တယ်။ Sensor ဆိုတာက စနစ်က ထွက်လာတဲ့တု့ံပြန်မှုကို အဝင်ဘက်ကို ပြန်လည်သတင်းပို့ဖို့ဆိုတဲ့ အလုပ်ကို လုပ်တယ်။ အဲဒီ Sensor ဆိုတာကို Feedback လို့လည်း သုံးတယ်။

Feedback ကိုမူတည်ပြီး အဝင်အပိုင်းကို လိုတိုး ပိုလျှော့ပြန်လုပ်ရတယ်။ Measured error ဆိုတာ လိုချင်တဲ့ ရလဒ်နဲ့ sensor ဆီက Feedback ကိုနှိုင်းယှဉ်ပြီး ဘယ်လောက်လွဲနေတယ်ဆိုတာပြတဲ့ လုပ်ငန်းဖြစ်ပါတယ်။ လွဲတာကို ညှိယူရတဲ့အပိုင်းကို ဆောင်ရွက်တာက Controller ကနေလုပ်ပေးပြီး အဝင်အပိုင်းကို ပြင်စေပါတယ်။ အဲဒီလို ဖြစ်စေချင်တဲ့ ရလဒ်ကို ထွက်လာတဲ့ တုံ့ပြန်သံတွေကနေ တဖြည်းဖြည်းချင်း လိုသလို ညှိယူသွားတဲ့ စနစ်ကို Feedback Control System လို့ခေါ်ပါသတဲ့။

တံခါးပဲ ထပ်သွားရအောင်ပါ။ သော့ထည့်လှည့်တယ်။ တံခါးမပွင့်ပါလားလို့ တွေ့တယ်။ တွေ့တယ်ဆိုတာကို Feedback လို့မှတ်ပါ။ ဒီလောက်လှည့်နေတာတောင် မပွင့်တဲ့တံခါး ကဲ မပွင့်ချင်ဦးလို့ ဒေါနဲ့မောနဲ့ ကန်လိုက်ရင်တော့ ကန်လိုက်တဲ့ ပြင်းအားပေါ်မူတည်ပြီး တံခါးပွင့်သွားနိိုင်ပေမယ့် တံခါးဆိုတဲ့ စနစ်ပျက်သွားမယ်ဆိုတာကိုလည်း တွေ့နိုင်ပါလိမ့်မယ်။ Feedback ဆိုတာကို အလေးထားပြီး ဒီသော့မဟုတ်ဘဲ တခြားတချောင်းများလားလို့ တွေးမိ၊ တခြားတချောင်းကို ရွေးလိုက်တယ်ဆိုတာဟာ Error ကို သတိပြုမိပြီး Controller ဖြစ်တဲ့ ဒီနေရာမှာတော့ ဦးနှှောက်ပေါ့၊ သူက သော့တချောင်းကို ရွေးလိုက်တယ်။ ဒီသော့နဲ့တော့ အံဝင်ဖြစ်နိုင်တာပဲဆိုပြီး။ မရသေးရင် နောက်တချောင်း ဆက်ကာ ဆက်ကာ ရွေးသွားရင်းနဲ့ ရွေးသွားရင်းနဲ့ ဆိုတာမှာလည်း သူက Error ဆိုတဲ့ အမှားကို နည်းသည်ထက်နည်းအောင် အမှားဘောင် ကျဉ်းသွားအောင် Control လုပ်ရတာဖြစ်ပါတယ်။ မှန်ကန်တဲ့ သော့နဲ့ တွေ့တဲ့အခါမှာ တံခါးပွင့်ပါလိမ့်မယ်။

တံခါးပွင့်ဖို့ဆိုတဲ့ အလုပ်တခုကို ဆောင်ရွက်ရာမှာ မှန်ကန်တဲ့သော့ဖြစ်ဖို့လိုအပ်သလို၊ ဒါဟာ မှန်ကန်တဲ့သော့မဟုတ်သေးဘူးဆိုတဲ့ တုံ့ပြန်မှုကို မှန်မှန်ကန်ကန်ရရှိဖို့လည်း လိုပါတယ်။ နောက်တခါ ရလာတဲ့ တု့ံပြန်မှုတွေကို မူတည်ပြီး သော့ရွေးတဲ့အခါ မှားနေတဲ့ လွဲနေသေးတဲ့သော့ကို ဖယ်ပစ်လိုက်ဖို့ လိုပါတယ်။ ဒါဟာ အမှားနည်းနိုင်သမျှနည်းအောင် လုပ်ယူနေတာဖြစ်ပါတယ်။

နိဂုံးချုပ်ရရင်တော့ တုံ့ပြန်မှုများမှ ညှိယူခြင်းဆိုတာမှာ ဘာကို ညှိယူနေတာလည်း ဆိုတာ သိဖို့လည်း မျက်ခြေမပြတ်ဖို့လိုပါတယ်။ error zero ဖြစ်အောင် ညှိယူရမယ်ဆိုတာကို သတိမူထားရပါမယ်။ error zero ဆိုတာကလည်း ဖြစ်ခဲပေမယ့် အနီးစပ်ဆုံး ဖြစ်နိုင်ရင်တော့ အကောင်းဆုံးပဲဖြစ်ပါတယ်။

အဲ ခြွင်းချက်အနေပြောရရင် မှန်ကန်တဲ့သော့နဲ့ ဖွင့်ပေမဲ့ တံခါးမပွင့်တာဟာ ကိုယ့်အိမ်က တံခါးမဟုတ်ဘဲ တခြားအိမ်က တံခါးဖြစ်မနေဖို့လည်း လိုပါတယ်။

ကျော်မောင်(တိုင်းတာရေး)

၁၅-ဇွန်-၂၀၁၇

ဒါတာဘေ့စ်တွေ

Database တွေကိုပြောတာပါ။ http://venus.wis.ntu.edu.sg/lib_databases/ မှာ ဝင်ရောက်လေ့လာနိုင်ပါတယ်။

ဒါတာဘေ့စ် နာမည်တွေ တွေ့နိုင်ပါတယ်။ သုံးတဲ့သူနာမည် (user name) နဲ့ စကားဝှက် (password) ရှိတော့မှ ထိုထိုဒါတာဘေ့စ်တွေအထဲကို ဝင်ရောက်ဖတ်နိုင်ပါတယ်။

တခါမှာ လက်ချာရိုက်နေတဲ့ ဆရာက ဒီလိုပြောပြဖူးပါတယ်။

သူ ကျောင်းစာကြည့်တိုက်ကို စာအုပ်သွားရှာရင်း ရောက်သွားတော့ လူတယောက်၊ အတိအကျပြောရရင် ကျောင်းတက်နေဆဲ ပညာသင်တယောက်၊ နိုင်ငံခြားသားဖြစ်ဖို့များပါတယ်၊ အဲဒီတယောက်က ဒါတာဘေ့စ်တွေထဲက စာတမ်းတွေ (Papers) ကို အားပါးတရ ကော်ပီကူးယူနေပြီး သူ့ မန်မိုရီတုတ်ချောင်းထဲ ပြောင်းထည့်နေတယ်။

Memory stick လို့ အဲဒီတုန်းက ခေါ်တယ်၊ နောက်ပိုင်းမှာ လက်မလောက်ပဲ ဖြစ်သွားလို့ thumb drive လို့ခေါ်တယ်၊ တလောကတောင် http://www.maxim.com/…/five-dimensional-data-storage-human-… ဆိုတဲ့သတင်းမှာ သိုလှောင်နည်းပညာတွေ အံ့မခန်းဖြစ်လာတာ ဖတ်လိုက်ရပါတယ်၊ နောက်ဆုံးပေါ်သတင်း latest news ဖြစ်တဲ့အတွက် ဖတ်ကြည့်ဖို့တိုက်တွန်းပါတယ်။ ဒါက စကားချပ်ပါ။

ဟိုလူရဲ့ အပြုအမူကို တွေ့တဲ့အခါ ဆရာလည်း စဉ်းစားလို့ မရဖြစ်နေတာရှိတယ်။ အဲဒါက အဲဒီလူဟာ ဘာကြောင့်မို့လို့ စာတမ်းတွေကို အငမ်းမရ ကူးယူနေရတာလည်း ဆိုတာပါပဲ။ စာကြည့်တိုက်ကို လာရင်လာ၊ ဒါမှမဟုတ် တနေရာရာကနေ အဲဒီ ဒါတာဘေ့စ်တွေထဲ ဝင်ပြီး အချိန်မရွေးကြည့်နိုင် လေ့လာနိုင်တာပဲတဲ့။ သိမ်းထားစရာ လိုလို့လားပေါ့။ သူက ဒီလိုတွေးနေတာ။

ဆရာပြောပြကတည်းက ကျနော်ကလည်း ဟိုလိုတွေးခဲ့ပါတယ်။ ဆရာသမားမသိတာက အကယ်၍များ ထိုပုဂ္ဂိုလ်ဟာ ကျောင်းမှာ လက်ရှိတက်ရောက်နေတဲ့ ပညာသင်မဟုတ်တော့ဘူးဆိုရင် သူ့အတွက်က ဘယ်လိုလုပ် အချိန်မရွေး ထိုထို ဒါတာဘေ့စ်တွေကို ဝင်ကြည့်နိုင်မှာလည်း။ ဒါကိုကြိုမြင်ပြီး သူကူးနေတာပဲ ဖြစ်ရမယ်လို့ တွေးခဲ့ပါတယ်။ ဟိုတယောက်ရဲ့ ကွက်ကျော်အတွေးကို ခံစားကြည့်တာ။ တခြားအကြောင်းလည်း ရှိရင်ရှိနိုင်ပါတယ်။

ဒါနဲ့ စကားစပ်လို့ဗျာ။ ကျနော်တို့ဆီက ဘယ်တက္ကသိုလ်တွေမှာများ အဲဒီ ဒါတာဘေ့စ်တွေ ပေါပေါများများ ရနေ သုံးနေကြပါပြီလည်းဆိုတာ သိချင်လှပါတယ်။ သိချင်ရုံသက်သက်ပဲဖြစ်ပါတယ်။

ကျော်မောင်(တိုင်းတာရေး)

၂၂-၂-၂၀၁၆

စာကြွင်း။ ။ Database ကို ဒါတာဘေ့စ်လို့ တိုက်ရိုက် မြန်မာမှု ပြုခြင်း၊ ထွင်ရေးခြင်း မဟုတ်ပါ။ ခေါ်နေကြအတိုင်း ကိုယ့်အသံထွက်အမှန်နဲ့ကိုယ်ပဲ အသံထွက်ကြပါရန်။

ခြင်ပြေးသော ဆားကစ်

တနေ့မှာ စာကြည့်တိုက်က ငှားလာတဲ့ ဒေါက်တာခင်မောင်ညို ရေးသော “ဟာသနဲ့လောဂျစ်“ အမည်ရှိ စာအုပ်ဖတ်တဲ့အခါ ခြင်တွေပြေးအောင်လုပ်ထားတဲ့့ အသံလှိုင်းရှိတယ်ဆိုတာ ကြားဖူးကြမှာပဲ ဆိုတဲ့ စာကြောင်းလေးကို ဖတ်မိရင်း ကျောင်းတက်တုန်းက လက်ဆော့မိခဲ့တာလေးကို သွားသတိရမိပါတယ်။

Bread-board လို့လည်းခေါ်တယ် (ခပ်ဖြူဖြူအရောင်ရှိပြီး ပေါင်မုန့်အရွယ်အစားသာသာလောက်ရှိလို့ ခေါ်တာဖြစ်မယ်)၊ Project-board လို့လည်း ခေါ်တယ်၊ အဲဒါကို သုံးပြီး (circuit)ဆားကစ်တွေ လိုက်ဆောက်နေတဲ့ကာလပေါ့။ မှတ်မှတ်ရရ လသာလမ်းဖက်က အီလက်ထရောနစ်အရောင်းဆိုင်တွေမှာ တွေ့ခဲ့ပြီး ဝယ်ခဲ့တဲ့ စာအုပ်လေးတအုပ်၊ ဆားကစ်တွေကို လိုအပ်တဲ့ ပစ္စည်းတွေ၊ တည်ဆောက်နည်းတွေ ပုံနဲ့တကွ ရှင်းပြထားတဲ့ စာအုပ်။ 

ကိုယ့်မှာရှိတဲ့ တိုလီမိုလီလေးတွေနဲ့ လုပ်ချင်တဲ့ ဆားကစ်ရွေးလိုက်တဲ့အခါ စာအုပ်ထဲမှာပါတဲ့ ခြင်ပြေးသော ဆားကစ်လုပ်ကြည့်မှပဲလို့ အတွေးပေါ်လာတယ်။ အဲဒါနဲ့ စတင်ဆောက်တယ်ပေါ့။ ညကလည်း ဖြစ်တော့ အိမ်သားတွေက အိပ်ကုန်ကြပြီ။ ဧည့်ခန်းထဲမှာ တယောက်တည်း စမ်းမယ်စိတ်ကူးနဲ့။ ဦးလေးအလတ်က နယ်ကရောက်လာတယ်။ သူက နယ်က ကြုံရင် ဝင်လာနေကြ။ ဟေ့ကောင် ကျော်ကြီး ဘာတွေလုပ်နေတာလည်း။ ဟာ ဦးလေးရ ခြင်ပြေးဆားကစ်လေး လုပ်မလို့။ အေး ကောင်းကွာ ငါလည်း  ခြင်ထောင်မထောင်တော့ဘူး။ မင်း ဆားကစ်ပြီးရင် ငါ့နားမှာ ထားလိုက်ပြောပြီး ဖျာခင်းကာ အပြီအပြင်ကို ယူပါတော့တယ်။

ဒီကကောင်လည်း တယောက်တည်းမဟုတ်၊ ဦးလေးက အားပေးတဲ့အနေနဲ့ ဘေးနားမှာ လာနှပ်နေရုံမက ဆားကစ်ပြီးသွားရင် သူ့နားမှာ လာထားလို့ မြှောက်သွားတဲ့အတွက် ဘာပြောကောင်းမလည်း မြှောက်ပေးလို့ကတော့ အားပါးတရ က အဲလေ ပျော်ပျော်ရွှင်ရွှင် ဆားကစ်ဆင်ပါတော့တယ်။ ဒါပေမယ့် စာအုပ်ထဲကအတိုင်း ဆင်ရမယ့် အစိတ်အပိုင်းတွေက အပြည့်အစုံမရှိပြန်ဘူး။ ဘာပဲဖြစ်ဖြစ် ခြင်တော့ ပြေးမှာပါဆိုပြီး ရှိတာလေးတွေနဲ့ ဆင်၊ ခြင်တွေလား၊ ပေါမှပေါဗျာ၊ ရန်ကုန်မှာ၊ အသံပေးပြီး ပျံနေကြတာ။ ဦးလေးက အိပ်နေပြီ။ သူ့တူအစွမ်း သူယုံတဲ့အတွက် ခြင်ထောင်လည်း မထောင်၊ စောင်လည်း မခြုံ။ ခြင်ပြေး ဆားကစ်ကို သူ့ရဲ့ခြေရင်းလောက်မှာ သွားထားလိုက်တယ်။

ပါ၀ါကို အွန်လိုက်တဲ့အခါမှာတော့ …

ကိုကိုခြင် မမခြင်တွေက မပြေးဘဲ ခြင်ပြေးဆားကစ်နားမှာ တဝဲလည်လည်နဲ့။ အင် ခြင်ပြေးအောင် လုပ်တဲ့ ဖရီကွမ်စီက ခြင်ကြိုက်တဲ့ ဖရီကွမ်စီများ ဖြစ်သွားတယ် ထင်ပါ့ဆိုပြီး ဟိုပြောင်းဒီပြောင်းလုပ်၊ အိပ်နေတဲ့ဦးလေးက အိပ်နေရာက တရေးနိုးပြီး ကျော်ကြီး ခြင်တွေပြေးပြီလားမေးတော့ ဘာမှားသွားလည်းမသိဘူး၊ ခြင်တွေကမပြေးဘဲ ဆားကစ်နားပဲ လာစုနေကြတယ်ဆိုပြီး ပြန်ဖြေတဲ့အခါ ဟေ့ကောင်ရာ တုံးပ၊ မင်းဆားကစ်ကို ဟိုးထောင့်မှာထားလိုက်၊ ခြင်တွေ အဲဒီကို သွားလိမ့်မယ်။ ငါလည်း ကောင်းကောင်းအိပ်ရမယ် ကဲ သွားထားလိုက် သွားထားလိုက်ဆိုတော့…

ကျော်ကြီး ဆင်သော ခြင်ပြေးဆားကစ်သည် ခြင်မပြေးဘဲ ခြင်ကြိုက်ဆားကစ်အဖြစ်သို့ ရောက်သွားပါကြောင်း ရှေးနှောင်းဖြစ်ဟောင်းကို အမှတ်ရကာ ခြင်အန္တရာယ် စုပေါင်းကာကွယ်ကြရန် ကလိထိုးရယ်ခိုင်းပြီး အသိမျိူးစုံကြွယ်သော တိုင်းနှင့်ပြည်နယ်တွင် နေကြကုန်သည့် စာဖတ်သူများအား တိုက်တွန်းနှိုးဆော်အပ်ပါကြောင်း။     ။

ကျော်ကြီး (ခ) ကျော်မောင်(တိုင်းတာရေး)

၂၂-သြဂုတ်-၂၀၁၅

Smaller or Bigger (Unit and its Prefix)

There are units in the measuring. For example metre. 1 metre, 2 metres, 10 metres. But how about 1000 metres? We call it as 1 kilometre. Kilo is equal to 1000. It becomes prefix. When we want small, 1 metre divided by 1000 = 0.001 metre. It is 1 millimetre. Milli is equal to 1/1000. In my school days, I had studied byheart those prefixes : 1 metre 100 centimetres, also 1 metre 1000 millimetre , etc. I could not get them byheart. Then, my father taught me writing the following.

yocto      zepto     atto     femto     pico      nano    micro    milli     centi    deci

deka     hecto    kilo      mega      giga     tera       peta     exa      zetta    yotta


After that he wrote these factors ;
 
10^-24   10^-21   10^-18    10^-15  10^-12  10^-9     10^-6    10^-3   10^-2     10^-1

10^1      10^2      10^3      10^6     10^9      10^12    10^15    10^18   10^21    10^24