မအိပ်ခင် ပုံပြောပြလို့ ဆိုတာနဲ့ ပုံပြောသူဟာ သူ့ရဲ့ ရှုပ်ထွေးလှတဲ့ ဦးနှောက်အကန့်တွေထဲမှာ သိမ်းထားခဲ့ဖူးတဲ့ သူကြားဖူးခဲ့တဲ့ ပုံပြင်တွေ၊ သူဖတ်ခဲ့ဖူးတဲ့ ပုံတိုပတ်စတွေကို ဆံပင်နက်တွေကြားထဲက ဆံပင်ဖြူငုတ်တိုလေးကို မွေးညှပ်နဲ့ ဆွဲနှုတ်ရသလို ဟိုတစ ဒီတစနဲ့ ခက်ခက်ခဲခဲ ဆွဲထုတ်ရင်း ဘယ်ပုံပြင်ကို အရင်ပြောပြရင် ကောင်းမလဲလို့ စဥ်းစားရတာဟာ ညတိုင်းပဲပေါ့။
စပြောမယ်လို့ ပြင်ခိုက်မှာပဲ နားထောင်မယ့်သူက ပုံပြင်အသစ်ပြောပြနော်၊ အဟောင်းတွေ နားမထောင်ချင်ဘူးလို့ တီတီတာတာ သတိပေးသံကြောင့် ရွေးထားတဲ့အပုဒ်ဟာ ပြောဖူးပြီးသားလား မပြောရသေးဘူးလားဆိုတာကို ပြန်လည်တွေးတောစိစစ်ယူရတာလည်း ပုံပြောသူအတွက် ကြိုမရှုပ်အောင် အပိုလုပ်ရတဲ့ လုပ်ငန်းစဉ်တခုပေပေါ့။ ကြိုမရှုပ်အောင် ဆိုတာက ဒီလို။ ပြောဖူးပြီးသားကို အတည်ပေါက်နဲ့ ထပ်ပြောဖို့ ကြိုးစားလို့ကတော့ အဲဒီညဟာ ပုံပြင်နားထောင်သူ ပရိသတ်လေးအတွက် ရကောက်နဲ့ ရစ်တဲ့ ညလေးအဖြစ် ပြောင်းလဲသွားနိုင်လို့ပါပဲ။
ဒါတွေကို ကြုံဖူးတဲ့အတွက် အရစ်မခံရအောင် ပုံပြင်အသစ်တွေဖတ်ရင်း ပုံပြောသူမှာလည်း ပုံပြင်ပြည့်ဝ စကားကြွယ်ဝတဲ့သူ ဖြစ်မှန်းမသိ ဖြစ်လာတာ ဘယ်သူပြောပြော မပြောပြော တဦးတည်းသော ပုံနားထောင်သူ ပရိသတ်ရဲ့ ချီးကျူးအားပေးခြင်းကို ရရှိတာကြောင့် တိုးတက်မှုမလျော့ပါးလေအောင် နေ့စဉ်လိုလို ပုံပြင်ဖတ်တဲ့ အမှုကို မှန်မှန်ကန်ကန်ပြုကျင့်ရပါတယ်။
ဒီညမှာလည်း အိပ်ခါနီးမှာ ပုံပြောပြဖို့ တောင်းဆိုပါတယ်။ ပုံပြောသူအတွက်ကလည်း ဒီလိုတောင်းဆိုမှုမျိုးကို မျှော်လင့်နေတာကြောင့်၊ မျှော်လင့်ဆို ဘယ်ပုံပြင်ကို ပြောပြရင် ကောင်းမလဲဆိုတာ ညစာစားနေရင်းနဲ့ ပထမထမင်းလုတ် ပါးစပ်ထဲမရောက်ခင်မှာကို အကန့်ထဲကနေ ရွေးထုတ်ပြီးသား ဖြစ်တာကြောင့် ရွေးပြီးသား ပုံပြင်လေး ပျောက်သွားမှာစိုးတာကြောင့်ပုံပြောပြဖို့ မြန်မြန်ဆန်ဆန်ပဲ ခြေဆင်းလိုက်ရပါတယ်။
သီချင်းတွေမှာပဲ ခြေဆင်းရှိတယ် မထင်ပါနဲ့။ ပုံပြင်မှာလည်း ခြေဆင်းရှိပါတယ်။ ပုံပြင်အတွက် ခြေဆင်းကတော့ ပုံပြင်ထဲမှာ ပါလာမယ့် ဇာတ်ကောင်တွေကို နားထောင်သူအတွက် အရင်ဦးဆုံး မိတ်ဆက်ပေးထားရတာပါပဲ။ အခုည ပြောမယ့် ပုံပြင်ထဲမှာပါမယ့် ဘီလူးဆိုတာက အဓိကဇာတ်ကောင်တစ်ကောင် ဖြစ်တော့ ပရိသတ်ကို ဘီလူးဆိုတာ ဘာလဲဆိုတာ ပြန်ပြီး နိဒါန်းပျိုးလိုက်ရတယ်။ အဲဒီလို အစွယ်ရှိတဲ့ ဘီလူးတွေရှိပေမယ့် အခုပုံပြင်ထဲက ဘီလူးကတော့ အစွယ်မပါဘူးကွယ့်။ ဒါနဲ့ အစွယ်မပါတဲ့ ဘီလူးဆိုတာ မြင်ဖူးသလားလို့ မေးကြည့်တော့ အရုပ်ထုတဲ့သူက အစွယ်မေ့ခဲ့လို့ ဖြစ်မှာပေါ့တဲ့။
ပုံတွေ ညတိုင်းပြောနေရတာ၊ တခါမှလည်း ပုံပြင်ဆုံးတဲ့အထိ နားထောင်တာ မတွေ့ဘူး၊ ပုံပြင်မပြီးသေးဘူး၊ ရှူး ရှဲ နဲ့ အိပ်တာပဲ ဆိုတော့ ပုံပြင်နားထောင်တဲ့ ပရိသတ်ဆီက ဒီလို တုံ့ပြန်ပါတယ်။
'အိပ်မက်ထဲမှာ ဆက်နားထောင်မယ်လေ' တဲ့။
တကယ်လည်း အိပ်မက်ထဲမှာ ဆက်နားထောင်နေပုံပါပဲ။ ပုံပြင်က အစပိုင်းပဲရှိသေး၊ အိပ်ပါလေရော။ ဒါကို ပုံပြောသူကလည်း သူ့ရဲ့ ပုံပြင်ပြောဟောနည်း အစွမ်းကြောင့်လို့ သူ့ကိုယ်သူ ဂုဏ်ယူလေ့ရှိပါတယ်။ ပုံပြင်ကို တုံးတိကြီး မဖြတ်ရက်လို့၊ မဖြတ်ရက်လို့ဆိုတာကလည်း ပုံတပုံထဲမှာ ပုံပြောကောင်းတဲ့ ဘုရင်ကြီးဟာ ပုံပြောနေတုန်း ဆက်မပြောနိုင်ဘဲ အိပ်ပျော်သွားတယ်လို့ ပါတယ်။ အဲဒီအခါ သူ့ပုံပြင်ကို လေလှိုင်းရှည်နဲ့ နားထောင်နေတဲ့ နတ်မင်းတွေ စိတ်ဆိုးပြီး ကျိန်စာတိုက်ကြသတဲ့။ ဒီပုံပြင်လေး ကြားဖူးထားတော့ ဟုတ်တာ မဟုတ်တာ ကိုယ့်အလုပ်မဟုတ်၊ ပုံဆိုတာ စပြောမိရင် အဆုံးထိရောက်အောင်ပြောရမယ် ဆိုပြီး စိတ်က ပိုင်းဖြတ်ထားလေတော့ ပြီးအောင် ဆက်ပြောနေမိတာပါပဲ။
အိပ်မက်ထဲမှာ ဆက်နားထောင်နေတဲ့အတွက် နောက်တနေ့ညကျ ပုံပြင်အသစ် ထပ်ပြောရမှာ ဖြစ်ပါတယ်။ ပုံပြင်အသစ်တွေကလည်း သူ့အကြောင်းပြောပါ ငါ့အကြောင်းပြောပါနဲ့ သူ့ထက်ငါ တိုးဝှေ့လို့ပေါ့။
ကျော်မောင်(တိုင်းတာရေး)
၁၄-ဇန်နဝါရီ-၂၀၁၉
မှတ်ချက်။ ။ အသစ်မရေးနိုင်သေးတဲ့အချိန် တက်လာတဲ့အဟောင်းလေးကိုပဲ နည်းနည်းပေါင်းသင်ပြီး ပြန်တင်ပါတယ်။ ကိုယ်ရေးထားတာ ကိုယ်ဖာသာ ပြန်ဖတ်ကြည့်တော့ ဟောင်းနေပေမယ့် ကောင်းနေဆဲရှိပါတယ်။ ပုံပြင်မပြောဖြစ်တာ ကြာပါပြီ။ ပြောဖို့ဆိုရင်လည်း ပုံပြင်တွေ ထပ်ဖတ်ရမှာပါ။ ဘယ်သူတွေများ ပုံပြင်အသစ်တွေ ရေးဖြစ်ကြပါလိမ့်။
No comments:
Post a Comment