"အေးပါကွာ ဒါဆိုလည်း တခြားအကြောင်းတွေ ပြောကြတာပေါ့"လို့ နှစ်သိမ့်ပြီး တခြားထွေရာလေးပါးတွေ ပြောကြတယ်။
တခြားအကြောင်းတွေ ပြောနေပေမယ့် စိတ်ထဲသိပ်တော့ ကျေလည်လှတယ်မဟုတ်ဘူး။ ဘာကြောင့်လဲဆို ဒီ ဝူဟန်အကြောင်းက နောက်ဆုံးပေါ်သတင်းကိုလည်း သိရအောင် သတင်းတွေကို မနက် နေ့လည် ည ဖတ်ကြည့်ထားရတာ၊ ဒီဝူဟန်ဗိုင်းရပ်စ်ဆိုတာ ဘာလည်း၊ ဘယ်လောက်အထိ ဖြစ်နိုင်တယ်လို့ သတင်းတွေက ရေးကြလဲ၊ ဘယ်လိုကာကွယ်ရမလဲက အစ၊ ဟိုနိုင်ငံတွေမှာဖြစ်ပြီး ဘာဖြစ်လို့ ကိုယ့်နိုင်ငံမှာမဖြစ်လည်းက အဆုံး လျှောက်ဖတ်ကြည့်ထားရတာ၊ လွယ်တာမှတ်လို့၊ ဒါလေးတွေ သိထားတာကို ဘေးနားရှိတဲ့သူနဲ့ပဲ ပြောနေတာဆိုတော့ သူ့မှာလည်း ဒါချည်းပဲထပ်နေလို့ထင်တယ် တခြားဟာပြောပါလို့ တောင်းပန်ရတဲ့အထိ။
မနေ့ညနေ မှောင်ရီပျိုးစမှာ နှစ်ယောက်သား အနီးအနားကို လမ်းလျှောက်ထွက်ကြတယ်။ အဲဒီမှာ မပွားရင် မနေနိုင်တဲ့အတွက် ဘာအကြောင်းပွားရင် ကောင်းမလဲလို့ ကြံရင်း ဒီလို အစပျိုးလိုက်တယ်။
"ဒို့တတွေ လမ်းလျှောက်ရင်းနဲ့ စကားပြောကြတာပေါ့"
"အင်း ပြောလေ"
"အေးကွ၊ သိထားတဲ့အကြောင်းအရာထဲကများဖြစ်မလားပဲ၊ ငယ်ငယ်တုန်းက ဖတ်ဖူးတဲ့ ဃောသကသူဌေးအကြောင်း"
"သေသေချာချာ မကြားဘူးဖူး"
"သာမာဝတီဆိုတာတော့ ကြားဖူးမှာပေါ့"
"ဟုတ်တယ် ကြားဖူးတယ်"
"အိုကေ အခုပြောမယ့် ဃောသကသူဌေးဆိုတာက နောက်ပိုင်းမှာ သာမာဝတီနဲ့ ပတ်သက်လာမယ့်သူ"
အဲဒီလို ခြေဆင်းလေးပျိုးပေးပြီး ဃောသကသူဌေးရဲ့ အရင့်အရင် ဘဝတွေက စလို့ ပြောလိုက်တာ သူဌေးဖြစ်ပြီး အလှူအတန်းတွေ ပေးနေတဲ့အချိန်အထိ ပြောဖြစ်တယ်။
"သူဌေးဘွဲ့ကို ဘုရင်ဆီမှာ သွားယူတော့ လမ်းမှာ ရေအိုင်လေးတွေ့၊ ခုန်ကျော်သွား၊ အပြန် သူဌေးဘွဲ့ရထားပြီးတဲ့အခါ ရေအိုင်လေးကို အလာတုန်းကလို ကမြင်းကြောထ မခုန်လွှားတော့ဘဲ ဖိနပ်ချွတ်ပြီး ရေထဲဆင်းလျှောက်၊ ဘုရင်က အားနေတဲ့အတွက် အလာရော အပြန်ရောကို လေသာပြတင်းပေါက်က တွေ့လို့ ပြန်ခေါ်ပြီး အကျိုးအကြောင်းမေး၊ အဲဒီဘုရင်ဆိုတာ ဥတေနမင်းကြီး၊ သူ့မှာလည်း သူ့ဇာတ်နဲ့သူ ရှိတယ်"
"ဟိုခုံတန်းလေးမှာ ထိုင်ရင်း ဆက်ပြောပါလား (ပြောနေတဲ့သူက မမောဘူး၊ နားထောင်တဲ့သူက မောနေပုံရတယ်)"
"ကောင်းသားပဲ"
"အဲဒီလို ဃောသကသူဌေးလေးကနေ နှစ်တွေကြာလာတော့ ဃောသကသူဌေးကြီးဖြစ်လာတယ်၊ သူက သူလှူတဲ့ အလှူပေးဇရပ်တွေဆီက ဆူညံဆူညံအသံတွေကြားရင် ပီတိဖြစ်လို့၊ ဒီဆူညံသံတွေဟာ သူဆင်းရဲတွေက အစားအသောက်တွေ အလုအယက်တောင်းယူကြ တိုးဝှေ့ကြလို့ ရန်ဖြစ်ကြတာကနေ ထွက်ပေါ်လာတဲ့ အသံတွေ၊ ဒီအသံတွေရှိရင် သူ့အလှူရှိနေတာပဲလို့ ခံယူထားတဲ့ သူဌေးကြီး၊ သာမာဝတီလာတော့မှ တန်းလေးတွေရိုက်ပြီး စနစ်တကျ အလှူခံယူတဲ့ပုံစံလုပ်ပေးလိုက်တာ၊ ကို ထင်တယ်ကွ၊ ဒီဇာတ်တော်ကို ဟိုးကတည်းက ဒို့မြန်မာတွေ သိထားတာ၊ ဒါပေမယ့် အခုအထိတန်းစီစနစ်က ဖရိုဖရဲဖြစ်တုန်း၊ သမခေတ်တုန်းက တန်းစီတာတော့ ခဏထားပေါ့။ စင်ကာပူက သာမာဝတီဝတ္ထုကို ဖတ်ပြီး လက်တွေ့အကောင်အထည်ဖော်သွားပုံရတယ်"
"သာမာဝတီဟာ နောက်တော့ ဃောသကသူဌေးကြီးက သမီးအဖြစ် မွေးစားလိုက်ပြီး ဘုရင် ဥတေနမင်းကြီးရဲ့ မိဖုရားဖြစ်လာတယ်။ အစေအပါးဖြစ်တဲ့ ခုဇ္ဇုတ္တရာရဲ့ ကျေးဇူးကြောင့် တရားသိခွင့်ရတယ်။ ခုဇ္ဇုတ္တရာဆိုတာကလည်း သူ့ဇာတ်လမ်းနဲ့သူရှိတယ်"
"အင်း အဲဒါ သိတယ်လေ၊ သူဘာလို့ ခါးကုန်းရတယ်ဆိုတာ"
"သာမာဝတီ မိဖုရားဖြစ်တဲ့အခါ မာဂဏ္ဍီမိဖုရားဆိုတာက မနာလိုဖြစ်။ အဲဒီ မာဂဏ္ဍီမိဖုရားဆိုတာကလည်း သူ့ဇာတ်လမ်းနဲ့ သူ သပ်သပ်ရှိပြန်တယ်။ အခုတော့ ဃောသကသူဌေးကြီးရဲ့ သမီးဖြစ်သွားတဲ့ သာမာဝတီအကြောင်းပဲ ဆက်ရအောင်၊ မာဂဏ္ဍီလုပ်တာနဲ့ သာမာဝတီနဲ့ သူ့ရံရွေတော်တွေဟာ မီးလောင်တိုက်သွင်းခံရပြီး သေကြရတယ်၊ သူတို့တွေ ဒီဘဝမှာ ဒီလိုဖြစ်တာကလည်း အရင်ဘဝတခုတုန်းက သူတို့ပြုလုပ်ခဲ့တဲ့ အကြောင်းတခုကြောင့်ဖြစ်တယ်"
"အဲဒီ သာမာဝတီဆိုတာ ဃောသကသူဌေးကြီးဆီ ဘယ်လိုရောက်လာခဲ့လည်း ဆိုတော့ သူတို့နေတဲ့မြို့မှာ ယင်နာရောဂါဖြစ်"
"ယင်နာရောဂါဆိုတာ"
"ကူးစက်ရောဂါလေ၊ အခုဖြစ်နေတဲ့ ဝူဟန်ဗိုင်းရပ်စ်လိုဖြစ်မှာပေါ့၊ နေဦးကွ ဝူဟန်ဗိုင်းရပ်စ်ဆိုတာ ………"
ကျော်မောင်(တိုင်းတာရေး)
၂၇-ဇန်နဝါရီ-၂၀၂၀
(မှတ်ချက် - မန်မိုတက်လာတာကို ပြန်ဖတ်ကြည့်တော့ ခေါင်းစဉ်ကို “သူ့ဇာတ်လမ်းနဲ့သူ” လို့ ပြောင်းလိုက်ဖို့သင့်တယ်။ သူ့ဇာတ်လမ်းနဲ့သူဆိုပေမယ့် အားလုံးဟာ အနည်းအများဆက်နွယ်နေကြတာဖြစ်တယ် )
၂၇-ဇန်နဝါရီ-၂၀၂၃
No comments:
Post a Comment