ပေတံမှာ အများအားဖြင့် သစ်သားပေတံများ ဖြစ်လေ့ရှိပါသည်။ သစ်သားပေတံများသည် မည်သို့သော သစ်ပင်အသားမှ ပေတံဖြစ်အောင် ဆောင်ရွက်ထားသည်မသိ၊ ပေါ့ပေါ့ပါးပါးရှိလှသည့်အတွက် ကျောင်းသူကျောင်းသားလေးများအဖို့ အဆင်ပြေတာပဲဟု ထင်စရာရှိသည်။ ပေတံ၏ အဓိကအလုပ်ဖြစ်သော မျဉ်းကြောင်းဖြောင့်ဖြောင့်ဆွဲရသော ကိစ္စတွင်မူ လွဲချော်မှုကြီးမားကြောင်း သုံးကြည့်သောအခါမှ ထင်ထင်ရှားရှားတွေ့သိကြရသည်။
ကျောင်းသုံးဗလာစာအုပ်သည် နာမည်နှင့်မလိုက်။ စာအုပ်ထဲရှိ စာရွက်များသည် ဗလာမဟုတ်ဘဲ မျဉ်းကြောင်းများနှင့်ဖြစ်သောကြောင့်ပင်။ ထိုကြောင့်ဖြစ်မည်၊ တချို့ကျောင်းသားမိဘများက ဗလာစာအုပ်ဟု မခေါ်ဘဲ မျဉ်းကြောင်းစာအုပ်ဟု ခေါ်ကြသည်။ မျဉ်းကြောင်းပါတဲ့စာအုပ်သွားဝယ်ချေဟု ပြောကြသည်။ ဗလာစာအုပ်တစ်အုပ်လောက် ပေးပါဟု ဈေးထဲတွင် ဝယ်လျှင် ပုံဆွဲစာအုပ်လားဟု ရောင်းသူက ပြန်မေးတတ်ကြသည်။ ပုံဆွဲစာအုပ်တွင် မျဉ်းကြောင်းများမပါ၊ ဗလာသက်သက်ဖြစ်သည်။ စာရွက်အသားက ဖြူပြီးထူသည်။
မျဉ်းကြောင်းစာအုပ်ရှိ မျဉ်းကြောင်းများသည် စာရွက်မျက်နှာပြင်တွင် အလျားလိုက် ရှိသည်။ စာမျက်နှာအပေါ် ပိုင်းတွင် တစ်လက်မသာသာ၊ အောက်ပိုင်းတွင် တစ်လက်မသာသာ မရှိတရှိ အလွတ်ထားသည်။ ထိုအလွတ်ထားသော အပေါ်အောက် စာမျက်နှာပြင်သည် သူ့အပေါ်တွင် ဘာစာမှ ရေးခြစ်ခွင့်မရှိဟု မကြေငြာထားသော်လည်း ကျောင်းသူကျောင်းသားအများစုမှာ ထိုမျက်နှာပြင်တို့ကို တို့ထိဝံ့သူ မရှိသလောက်နည်းပါးကြသည်။ မျဉ်းကြောင်းပေါ်တွင်သာ ရေးကြခြစ်ကြသည်။ စာကြွင်းအနေဖြင့် ထပ်ဖြည့်ရပါလျှင် စာမျက်နှာအပေါ်ထောင့်စွန်းလောက်တွင် နေ့စွဲရေးကြသည်လည်း ရှိသည်။
တစ်ရက်တွင် အဖေက ကျောင်းသုံးဗလာစာအုပ်ထဲတွင် ရေးထားသည်များကို တွေ့ပြီး
"ဘာဖြစ်လို့ ဒီအပေါ်က လွတ်နေတဲ့နေရာမှာ မရေးရတာလဲ" ဟု မေးသည်။
"မျဉ်းကြောင်းမှ မပါတာ အဖေ၊ ပြီးတော့ ဘယ်သူမှလည်း အဲဒီနေရာမှာ မရေးကြဘူး" ဟု ပြန်ဖြေသည့်အခါ
"မင်းတို့ကွာ နေရာလွတ်တွေ အများကြီးဖြစ်ကုန်တာပေါ့"ဟု ဆိုသည်။
"ရေးကွ၊ အဲဒီနေရာလွတ်မှာ တက်ရေးကွ"ဆိုပြီး တိုက်တွန်းသည်။
သူတိုက်တွန်းသည့်အတိုင်း စာမျက်နှာအပေါ်ပိုင်းများတွင် တက်ရေးသည်။ စာရွက်အောက်ပိုင်းက လွတ်သည့်နေရာတွင်လည်း ရံဖန်ရံခါရေးသည်။ ဆရာမ တစ်ယောက်နှစ်ယောက်လောက်က သတိပြုမိပြီး မေးကြသည်။ အိမ်က အဖေက ရေးခိုင်းတာဟု ခပ်တည်တည်ဖြေသည့်အခါ ဘာမှ ပြန်မပြောကြ မဆူကြပါ။ သူရေးသလို လိုက်ရေးကြဟု တခြားသူများကို မတိုက်တွန်းပါ။ ရေးသည်ကို မြင်သော ဘယ်အတန်းဖော်မှလည်း တုပပြီး လိုက်မရေးကြပါ။ ကိုယ်တိုင်ကတော့ ထိုသို့ရေးရသည်ကို နှစ်ခြိုက်မိခဲ့သည်။
တချို့က မျဉ်းကြောင်းနှစ်ကြောင်းကြားတွင် စတိုင်ထွင်ပြီး ရေးသည်။ သူငယ်ချင်းအတန်းဖော်တစ်ဦးမှာ မျဉ်းကြောင်းနှစ်ကြောင်းကြားတွင် စာရေးလေ့ရှိသည်။ သူရေးသည်ကို သဘောကျ အတုယူပြီး မျဉ်းကြောင်းကြားတွင် လိုက်ရေးဖူးသည်။ ဘောင်အတွင်း ရေးခြင်း၏ အကျိုးက စာမေးပွဲဖြေသည့်အခါ များစွာပေးသည်။
စာသင်သည့်အခါ မျဉ်းကြောင်းပါသော စာအုပ်များကို သုံးရသည်။ စာမေးပွဲဖြေသည့်အခါ မျဉ်းကြောင်းပါသော စာဖြေစာရွက်များကို ပေးမသုံးပါ။ ထူးခြားမှုဖြစ်ပါသည်။ ထူးခြားမှုဆိုသည်ထက် မညီမျှမှုဟု ပြောလျှင် ပိုသင့်ပါသည်။ ဒါကို မိဘများက ဆူဆူညံညံ ပြောကြသော်လည်း ကျောင်းနံရံများသည် အုတ်နံရံများဖြစ်သောကြောင့် အတွင်းသို့ မထိုးဖောက်နိုင်ပုံရသည်။
မိဘများက စာဖြေကျောင်းသူကျောင်းသားများကို နည်းမျိုးစုံဖြင့် ထိုအခက်အခဲကို ကူညီဖြေရှင်းပေးကြသည်။ မျဉ်းကြောင်းဆွဲထားသော ကတ်ထူပြားများ ယူသွားပြီး ဖြေလွှာစာရွက်အောက်တွင် ခံရေးခိုင်းသည်။ အောက်ခံတွင် မျဉ်းကြောင်းများကို မြင်ပြီး စာရေးရာတွင် ဖြောင့်ဖြောင့်တန်းတန်းရေးနိုင်သည်။ စာမေးပွဲဖြေသည့်အခါ ဘော့ပင် ခဲတံ ခဲဖျက် ပေတံမှ အပ မည်သည့်စာရွက်မှ မည်သည့်အောက်ခံပြားမှ ယူခွင့်မရှိဟု ကျောင်းက စာမေးပွဲစည်းမျဉ်းပြောင်းသည်။ ထိုတွင် မိဘများက သားသမီးများကို ဗလာစာရွက်ပေါ်တွင် ခဲတံဖြင့် မျဉ်းကြောင်း သုံးကြောင်းခပ်ဖွဖွရေးဆွဲပြီးမှ ဖြေဖို့ သင်ပေးကြသည်။
ဗလာစာရွက်တစ်ရွက်ပေးလိုက်ပြီး စာရေးခိုင်းလိုက်သည့်အခါ ဖြောင့်တန်းစွာရေးနိုင်သည့်သူသည် အာဂလူဟု ဆိုနိုင်ပေမည်လား။ မျဉ်းကြောင်းပါမှ ရေးတတ်သူသည် စာရေးသက်နည်းသေးသောသူဟု ဆိုနိုင်ပေမည်လား။
သေချာသည်ကတော့ စာရွက်ပေါ်တွင် စာရေးကိရိယာကိုင်ကာ စာရေးကြသောသူများ သိသိသာသာလျော့နည်းသွားပြီ ဖြစ်သည်။ လက်ရေးလေးက လှလိုက်တာဟု ချီးကျူးသံ ချီးမွမ်းသံ ကြားချင်ပါလျှင် လက်ရေးလှလှ ရေးကျင့်မှ ဖြစ်ပါမည်။ လက်ရေးလှလှ ရေးကျင့်ဖို့အတွက် မျဉ်းကြောင်းပါသော စာရွက်ကို ရွေးမည်လား ဗလာစာရွက်ကို ရွေးမည်လားဆိုသည်ထက် ခဲတံနှင့် ရေးမည့်သူဆိုပါက ခဲတံချွန်နည်းကို တတ်ကျွမ်းဖို့လိုပေလိမ့်မည်။
ခဲတံကောင်းကောင်းချွန်တတ်ပါလျှင် လက်ရေးကလည်း လှနေဖို့ သေချာနိုင်ပါသည်။ ခဲတံကောင်းကောင်းချွန်တတ်ဖို့ လေ့ကျင့်ပေးရပါမည်။ ခက်သည်မှာ ခဲတံချွန်စက်ဖြင့် ခဲတံကို ချွန်မည်လား၊ ခဲတံချွန်ဓားဖြင့် ခဲတံကို ချွန်မည်လားဟု ဝေခွဲမရ ဖြစ်နိုင်ပါသည်။ ချွန်ပြီးသောခဲတံကို ဖောင်းထားသောပါးတစ်ဖက်ပေါ်အသာတင်ကာ ခဲတံချွန်မချွန်စမ်းသပ်သောနည်းကိုလည်း တပါတည်းသင်ပေးလိုက်ကြဖို့လိုပါလိမ့်မည်။ မျဉ်းကြောင်းပါလည်း ရေးတတ်၊ မျဉ်းကြောင်းမပါလည်း ရေးတတ်သော ခဲတံကိုင်စာရေးသူများ ပေါ်ထွန်းလာဖို့ မျှော်လင့်မိပါသည်။
၂၂-ဇန်နဝါရီ-၂၀၂၃
No comments:
Post a Comment