တခါက စာပေဟောပြောပွဲသွားနားထောင်ပြီး အခမ်းအနားပြီးသော်လည်း မပြန်သေးဘဲ စာရေးဆရာကြီးတဦးနှင့် စကားစမြည်သွားပြောဖြစ်သည်။ ထိုဆရာကြီးထိုးပေးသော အော်တိုလက်မှတ်အောက်တွင် "အရေးကြီးတာ အရင်လုပ်"ဆိုပြီး ရေးပေးသွားသည်။
ခက်ပြီ။
အရေးကြီးတာတွေများတာထဲမှာ ဘယ်ဟာက အရေးကြီးမှန်း ဆုံးဖြတ်ရခက်သည်။
အရေးမကြီးတာတွေကို အရင်မလုပ်နဲ့။ ထိုကဲ့သို့ ဘာသာပြန်လိုက်မှ အဆင်ပြေသွားသည်။
အရေးမကြီးတာတွေကို ဖယ်ရင်းဖယ်ရင်းဖြင့် အရေးကြီးတာတွေက ကျန်ခဲ့ပြီး ထိုထိုအရေးကြီးသောကိစ္စများကို အရင်ဆုံး ဆောင်ရွက်ဖြစ်သည်။ တခါတလေတွင် အရေးမကြီးတာများကို မလုပ်သေး မလုပ်သေးဖြင့် အရေးကြီးသောကိစ္စများ တခုမှ မတွေ့သဖြင့် အေးအေးဆေးဆေးနားခဲ့ရဖူးသည်။
"အရေးပါ အရာရောက်" ဆိုသော စကားကို ငယ်ငယ်ကတည်းက ကြားဖူးနားဝရှိလှသည်။ အဲဒီလူက အဲဒီနယ်မှာ အရေးပါ အရာရောက်တဲ့သူပေါ့ဟု ဆိုလျှင် ထူးထူးဆန်းဆန်းကြည့်ဖြစ်အောင် သွားကြည့်ဖြစ်သည်။ သူများထက်ထူးပြီး ဦးခေါင်းတလုံးများ ပိုပါသလားဟု။
"ပေါက်မြောက်သူ" ဟု သုံးကြသည်ကိုလည်း တွေ့ဖူးကြားဖူးသည်။ သူက အထက်ရော အောက်ရော ပေါက်မြောက်သူလေဆိုလျှင် နတ်ပြည်လည်းရောက်ဖူး ငရဲပြည်လည်း ရောက်ဖူး၊ ထိုအထက်နှင့်အောက်သို့ အစုန်အဆန်သွားနေသော သံသရာခရီးသည်ကြီးများလားဟူ၍ အထင်ကြီးမိသည်။
သွားစမ်းပါကွာ အရေးမပါတာတွေ လာပြောနေတယ် ဟု ပြန်ပြောလေ့ရှိကြသည်။ အရေးမပါတာတွေဆိုတော့ အရေးပါတဲ့ဟာတွေက ဘာတွေလဲဟု မေးခွန်းပြန်လှန်ထုတ်သော် တဖက်နှင့်တဖက် မကျေမနပ်ဖြစ်ကြလေသည်။
စာရေးဆရာသည် သူရေးဖွဲ့ခဲ့သော စာကို အလေးထားသည်။ ထိုစာသည် သူဖန်တီးသောစာဖြစ်သဖြင့် သူအဖို့တွင် အရေးကြီးသောစာဖြစ်သည်။ စာတကြောင်းရေးရဖို့ ဖြစ်လာဖို့ ဖန်တီးရသည်မှာ မလွယ်ကူမှန်း သူသိသည်။ ထိုကြောင့် သူ့စာကို အလေးထားသည်။ ထို့အတူပင် တခြားတခြားသော စာရေးဆရာများ၏ လက်ရာကောင်းများ ဖန်တီးမှုများကိုလည်း အလေးထားသည်။ ထိုအရာများသည် အရေးကြီးသောအရာများ ဖြစ်သည်ဟု သူခံယူသည်။
ဂီတသမားသည် သူရေးလိုက်သော ဖွဲ့နွဲ့လိုက်သော သီချင်းစာသားဖြစ်စေ သံစဉ်ဖြစ်စေမှ အလုံးတိုင်း အလုံးတိုင်းကို အရေးပါသော အလုံးများ ခံစားမှုများအဖြစ် လက်ခံထားသည်။
ပန်းချီသမားသည် သူ့ပန်းချီကားချပ်ရှိ စုတ်ချက်တိုင်းကို သူ့ခန္ဓာကိုယ်အစိတ်အပိုင်းများသဖွယ် သဘောထားသည်။
နေ့စဉ်ထမင်းချက်သော အိမ်ရှင်မတိုင်းသည် ထမင်းအပျော့အမာနှင့်ပတ်သက်ပါက အလွန်ပင် စိတ်လှုပ်ရှားတတ်ကြလေသည်။ ထမင်းအပျော့အမာသည် သူတို့အတွက် အရေးပါသော စွမ်းဆောင်ချက်ကို ပြသည့်နှယ်ဖြစ်သည်။
လူတိုင်းလူတိုင်းသည် သူ့နယ်ပယ်တွင်သူ ပေါက်မြောက်ကြသူချည်းဖြစ်ကြသည်။ အစားမက်သူသည် အစားအသောက်နယ်ပယ်တွင် ပေါက်မြောက်ပါပေသည်။ အလှကြိုက်သူသည် မည်သို့မည်ပုံလှအောင် လိမ်းခြယ်ရမည်ကို အသေအချာသိသူဖြစ်ပေသည်။ ဘောပွဲကြည့်အားသန်သူသည် ဘယ်ကစားသမားက ဘယ်အလုံးကို ဘယ်ပွဲတုန်းက ဘယ်လိုကန်သွင်းခဲ့တာဟု မမေ့မလျော့ပြန်ပြောပြနိုင်ပေသည်။
စာမဖတ်သူအဖို့ စာရေးဆရာများ၏ သိမှတ်ဖွယ်ရာ ခံစားဖွယ်ရာ အဖြာဖြာသည် အရေးမပါသောအရာများ ဖြစ်ပေသည်။
ဂီတကို မနှစ်သက်သူသည် စည်းသံ ဝါးသံကိုပင် ခံရခက်ပေလိမ့်မည်။
နာမည်ကျော်ပန်းချီကား(တနည်း)ကမ္ဘာကျော်ပန်းချီကားဟု ပန်းချီဝါသနာအိုးများလက်ခံထားသည့် ပန်းချီလက်ရာများသည် ပန်းချီကို မခံစားတတ်သူအဖို့ အရေးမပါသော ဟိုခြစ်ဒီခြစ်များအဖြစ် မှတ်ယူပေမည်။
အရေးမကြီးသည်များ အရေးကြီးသည်များ အရေးပါသည်များ အရေးမပါသည်များ ပေါက်မြောက်သည်များ မပေါက်ရောက်သည်များအား တွေးဆမိရင်း ငါအတော်ဟုတ်လာပါလားဟု မြောက်ကြွမြောက်ကြွဖြစ်မိပါလျှင် သိမှုနှင့် ဖြစ်မှုနှစ်ခုသာရှိသော သတ္တဝါပါလားဟူသောအတွေးဖြင့် မာန်ချနိုင်သည်ကလည်း လက်ရှိလောကကြီး၏ ကောင်းကွက်ပေလားဟူ၍ ခေါင်းတညိတ်ညိတ်ဖြစ်မိနိုင်ပါကြောင်း။
ကျော်မောင်(တိုင်းတာရေး)
၂၈-မေ-၂၀၂၄
No comments:
Post a Comment