ကစားသမားတိုင်း ကစားဖူးသူတိုင်း သိကြတယ်။ တအိမ်လိုဆိုတာနဲ့ အဲဒီအိမ်ထဲ ပိုက်ဆံပိုက်ပြီး ပြေးပြေးဝင်တတ်ကြတယ်။ တအိမ်လိုတယ် မင်းပါမလားဆိုတဲ့အခါ နှစ်ပွဲသုံးပွဲမကစားနိုင်တဲ့သူတွေဆို တအိမ်လိုထဲ ပြေးမဝင်နိုင်ကြဘူး။ အဲဒီတော့လည်း ဘေးထိုးလုပ်ရတာ။ ဘေးထိုးရဲ့ အားသာချက်က အိမ်ကောင်းနေတဲ့ဘက်ဆိုရင် ဘေးထိုးရဲ့အိတ်ကပ်ဟာလည်း ဖောင်းလာတတ်လေ့ရှိတယ်။ အားနည်းချက်ကတော့ ကတ်ပြားကို ကိုယ့်လက်နဲ့ကိုယ်တိုင် အရသာခံပြီးပွတ်ကြည့်ရတာ မဟုတ်တဲ့အတွက် နည်းနည်းတော့ အရသာပျက်တာပါပဲ။
ဖဲထုပ်နှစ်ထုပ်ဗူးခွံနဲ့ ဖဲချပ်တိုင်းရဲ့ကျောဘက်မှာ လေကြောင်းလိုင်းတခုအမှတ်အသားပါတော့ အံ့အားသင့်မိတယ်။ ဝီကီမှာရေးထားချက်ကို ဖတ်ရတဲ့အခါမှ လေကြောင်းလိုင်းတွေမှာ ခရီးသည်တွေကို ဖဲထုပ်ဝေတဲ့အလေ့အထရှိခဲ့ကြောင်းတွေ့ရတယ်။ ဒီအလေ့အထဟာ အခု ခေတ်မစားတော့ပြီလို့ပြောတယ်။
ကစားနည်းနဲ့ပတ်သက်လို့ မှတ်မိတာလေးတွေ ရှိတယ်။
အဖေက သူ့သားနှစ်ယောက် အရွယ်ရောက်တဲ့အခါ မင်းတို့ကို ဖဲကစားနည်းသင်ပေးရဦးမယ်လို့ ခဏခဏပြောတယ်။ သားတွေကလည်း အဖေသင်ပေးမယ့်အချိန်ကို စောင့်နေတာနဲ့ ကျွမ်းကျွမ်းကျင်ကျင်မကစားတတ်ကြ။ တခါမှာတော့ နောက်ချင်တာနဲ့ အဖေ ဖဲရိုက်နည်းသင်ပေးမယ်ဆိုတာ လုပ်လေ ဆိုတော့ ဖဲထုပ်က အိမ်မှာမရှိ၊ ကွမ်းယာဆိုင်သွားဝယ်ကွာဆိုပြီး ပြောတဲ့အခါ ဘေးမှာရှိတဲ့အမေက ကြားပြီး ဒီသားအဖတွေ အိမ်ပေါ်မှာ ဖဲမရိုက်ကြပါနဲ့ မလုပ်ကောင်းပါဘူးဆိုတဲ့ ရှေးထုံးဗီတိုသုံးပြီး ပယ်ဖျက်လိုက်တာကနေ ဖဲသင်ပေးတဲ့ဆီ မရောက်။
အခုက တမျိုးတွေးမိပါတယ်။ အဖေဖြစ်စေချင်တာက ဒီလိုဖြစ်ဖို့များပါတယ်။ သားတွေဟာ ဒီလိုပညာရပ်နဲ့ပတ်သက်ရင် အရပ်ထဲမှာပဲဖြစ်ဖြစ် ကျောင်းကနေပဲဖြစ်ဖြစ် တတ်မြောက်လာဖို့ရည်ရွယ်ပုံရပါတယ်။ အဖေသင်ပြပေးစရာမလိုတော့ဘူး၊ ကျနော်တို့တော့ ဖဲနည်းမျိုးစုံထဲက ဘယ်နည်းတွေကိုတော့ ရိုက်တတ်နေပြီဆိုတာမျိုး ဖြစ်ချင်ပုံရပါတယ်။ အိမ်ပေါ်ကို ဖဲထုပ်တင်ခွင့်မရတဲ့အခါ ဖဲချပ်နဲ့မပြဘဲ ဖဲရိုက်နည်းတွေကိုတော့ အလျဉ်းသင့်ရင် ပြောပြတတ်ပါတယ်။ ကောင်းစွာ နားမလည်ခဲ့ ကောင်းစွာ မတတ်မြောက်ခဲ့ပါ။
အခုတော့ သူဖဲရိုက်နည်း မသင်ပေးခဲ့ရတဲ့ သူ့သားကနေ သူ့မြေးမလေးကို ဖဲနည်းမျိုးစုံတွေထဲက တွမ်တီဝမ်းနဲ့ ပိုကာဒေါင်းတာလောက် အင်ထရိုအနေနဲ့ သင်ပေးနိုင်ခဲ့တယ်။ အူနို (Uno) ကစားတတ်နေတဲ့ကလေးကို အနည်းငယ်ပြောပြလိုက်တာနဲ့ နားလည်လွယ်တာ သတိထားမိတယ်။
မှတ်မိတဲ့နောက်တခုက ရပ်ရွာထဲက နာရေးအိမ်တွေမှာ ဖဲဝိုင်းလုပ်ကြတဲ့အခါ ရှိုးကစားတဲ့ဝိုင်းမှာ ကစားကြသူတွေဟာ တကယ့်ဖဲသမားကြီးတွေပုံစံပါပဲ။ ရှိုးကစားနေကြသူတွေဟာ ဂျိမ်းစ်ဘွန်းကားတွေထဲက ဇာတ်ကောင်တွေစတိုင်အတိုင်း မျက်နှာအနေအထား ထားတတ်ကြလို့ ရှိုးကစားနေကြပြီဆိုရင် အနိုင်အရှုံးထက် ကစားသူတွေရဲ့ သရုပ်ဆောင်ပီပြင်မှုကို မြင်တွေ့ရတာက ရယ်စရာလိုလိုဖြစ်နေတတ်ပါတယ်။ တွမ်တီဝမ်း ဘူကြီး ရှမ်းကိုးမီး ကစားတဲ့သူတွေကိုတော့ ကလေးဝိုင်းသာသာသဘောထားတတ်ကြတယ်။ အချိန်ကုန်ချင်တဲ့အခါ ပိုကာဒေါင်းကြတယ်။
အဖေက တခါမှာ ဖဲဝိုင်းဘေးထိုးလေ့ရှိသူအကြောင်းကိုသိတော့ သူနဲ့ကြုံတဲ့အခါ ဖဲကစားနည်းမှာ ဖဲချပ်ဘယ်နှစ်ချပ်ပါလည်းလို့ မေးပါတယ်။ ဟိုလူက မဖြေနိုင်တဲ့အခါ မင်းကွာ ဘေးထိုးတာတောင် ဖဲချပ်ဘယ်လောက်ပါလည်းဆိုတာလောက်တော့ သိအောင်လုပ်ပါကွာလို့ ပြောပါတယ်။
ပင်လယ်ပျော်ကြီးတယောက်ဖြစ်တဲ့ ဦးလေးပြောပြခဲ့တဲ့ နိုင်ငံကျော်အဆိုတော်ကြီးတယောက်ရဲ့ ဖဲရိုက်ကျွမ်းကျင်ပုံ၊ ဖဲကိုင်တဲ့လက်ချောင်းလေးတွေဟာ နူးညံ့နေပုံ (ဖဲချပ်ကို လှန်ကြည့်စရာမလိုပဲ ပွတ်ကြည့်တာနဲ့သိလောက်အောင်နူးညံ့)၊ ဘယ်လောက်ပဲ နိုင်နေနေ ရှုံးနေနေ မိန်းမပြောထားတဲ့အချိန်ပြည့်တာနဲ့ ဖဲဝိုင်းက ထပြန်ပုံကို ကြားခဲ့ရဘူးတယ်။ သူသိတာကလည်း တဆင့်စကားဆိုတော့ ဟုတ်ချင်မှာ ဟုတ်နိုင်မယ့်ပုံပါပဲ။
မိတ်ဆွေတယောက်ရဲ့ ကျောင်းနေဖက်ဖြစ်သူ တယောက် ပြောပြတာကလည်း စိတ်ဝင်စားစရာပါ။ သူက ဖဲရိုက်တာမှာ နာမည်ကြီးမင်းသမီးကြီးတွေနဲ့ ရိုက်ဖူးတဲ့သူဖြစ်ပါတယ်။ သူကတော့ ဖဲဆရာဖြစ်ပုံရပါတယ်။ ဖဲအကြောင်း ဖဲကစားနည်းနဲ့ပတ်သက်လို့ မမေးခဲ့ရတာ နောင်တရမိပါတယ်။
ပြဿနာက ဖဲကစားနည်းမှာ ငွေကြေးပါလာတဲ့အခါ လောင်းကစားဖြစ်တာပါပဲ။ လောင်းကစားဖြစ်တဲ့အခါ တပြားရှုံးရှုံး နှစ်ပြားရှုံးရှုံး ပြူးတော့ပြဲတော့တာပါပဲ။
ဖဲကစားနည်းကို အပျော်ကစားကြတာမျိုး ဉာဏ်ရွှင်အောင် ကစားကြတာမျိုး နည်းကြပါတယ်။ ဖဲသမားဆိုရင် လောင်းကစားသမားဆိုပြီး နှာခေါင်းရှုံ့ချင်ကြတယ်။
တွေးမိတာက ဖဲကစားနည်းကို ပြိုင်ပွဲပုံစံလုပ်ပြီး ဒိုင်းတွေဘာတွေပေးရင်လည်း ဖဲကစားနည်းဟာ ပိုက်ဆံနဲ့ကစားရတာလောက် စိတ်ဝင်စားဖွယ်ကောင်းမှာ မဟုတ်ပါ။
တအိမ်လို လို့သာ အသံပြုလိုက်ပါ။ ဝင်မယ် ဝင်မယ်ဆိုတဲ့အသံတွေကို ကြားရပါလိမ့်မယ်။ ဖဲကစားနည်းဟာ အစမပြုလိုက်နဲ့၊ စ လိုက်တာနဲ့ စွဲမက်စေတဲ့ကစားနည်းဆိုတာ ကစားကြည့်မှသိနိုင်ပါလိမ့်မယ်။
ဖဲကစားခြင်းဖြင့် အတွက်အချက်တော်နိုင်ကြပါစေ၊
သရုပ်ဆောင်ကောင်းနိုင်ကြပါစေ၊
ဉာဏ်ရွှင်နိုင်ကြပါစေ။
ကျော်မောင်(တိုင်းတာရေး)
၂၉-ဇွန်-၂၀၂၄