Snapshots taken on the way to office and around food courts visited.
စင်ကာပူမှာ တွေ့ရတဲ့ နံရံပန်းချီတချို့ဖြစ်ပါတယ်။
စိတ်ဝင်စားပြီး ရိုက်ခဲ့မိတဲ့ ပုံများပါ။
May 31, 2023
ဘာကစားမလဲ
တဖက်ရပ်ကွက်ရှိ အလယ်တန်းကျောင်းသို့ ဆဋ္ဌမတန်းကျောင်းသားသစ်အနေဖြင့် ပြောင်းတက်စဉ် ကာယနည်းပြဆရာမကို ခဏတာ တွေ့ကြုံခွင့် သိခွင့်ရလိုက်သည်။ ထိုနှစ်မှာပဲ ဆရာမက တခြားကျောင်းသို့ ပြောင်းသွားသည်။ လူပုံသဏ္ဍာန်ရေးဆွဲထားသည်များပါသော သွေးပူလေ့ကျင့်ခန်းပြုလုပ်နည်း စာရွက်ညိုညိုတစ်ရွက် ရလိုက်သည်။
ကာယနည်းပြဆရာတစ်ယောက် ကျောင်းသို့ပြောင်းလာသည်။ ထိုဆရာသည် ဘတ်စကတ်ဘောနှင့် စားပွဲတင်တင်းနစ်ကစားသမားဖြစ်ပုံရပါသည်။ ဆရာ့ဆီက ဘတ်စကတ်ဘောနှင့် စားပွဲတင်တင်းနစ်ကစားနည်းစနစ်များ၊ စည်းမျဉ်းစည်းကမ်းများ မရခဲ့ပါ။ အကြောင်းမှာ ကစားရန် ကွင်းမရှိခြင်း ခုံမရှိခြင်းတို့ကြောင့်လည်း ဖြစ်နိုင်ပါသည်။ နှမြောဖို့ အလွန်ကောင်းကြောင်း မသိခဲ့။
ယခုတွေးမိသည်မှာ ကွင်းမရှိ ခုံမရှိသော်လည်း ကစားနည်းနှင့် စည်းမျဉ်းစည်းကမ်းစသည်များကို အဘယ်ကြောင့် မလေ့လာခဲ့ရ မသင်ကြားခဲ့ရဆိုသည့်အကြောင်းဖြစ်သည်။
မိဘဆရာအသင်းနှစ်ပတ်လည်တွေ့ဆုံပွဲနှင့်ဆုပေးပွဲတွင် မြို့နယ်ပညာရေးမှူးဆရာမကြီးပြောခဲ့သည်ကို ကြားခဲ့ပြီး အားတက်ခဲ့ရသေးသည်။ သူက ပြောပါသည်။ ဘတ်စကတ်ဘောကွင်းဖြစ်အောင်လုပ်ဖို့ တိုက်တွန်းထားခြင်းဖြစ်သည်။ ရှစ်တန်းအောင်၍ အထက်တန်းကျောင်းသာ ပြောင်းတက်ကြသည်၊ ဘတ်စကတ်ဘောကွင်းများ အလယ်တန်းကျောင်းတွင် ရနေပြီလားဟု ကျောင်းသို့ သွားကြည့်မိရသည်မှာ ခဏခဏ။
အလယ်တန်းကျောင်းတက်ခဲ့ပြီးမှ ကျောင်းပိတ်ရက်အတွင်း ထိုကျောင်းဝန်းထဲတွင် ပိုက်ကျော်ခြင်းသွားခတ်ဖြစ်သေးသည်ကိုလည်း အမှတ်ရမိသည်။
ကျောင်းသားဘဝ အားကစားနှင့် ပတ်သက်၍ သတိရမိသူ အတန်းဖော်သုံးဦးရှိခဲ့သည်။ ထိုသုံးဦးစလုံးနှင့် ခင်မင်ရင်းနှီးသည့် သူငယ်ချင်းမဖြစ်ခဲ့။ အတန်းဖော်အနေဖြင့် ပြောဆိုသည်လောက်သာ ရှိခဲ့သည်။
တစ်ယောက်က သိုင်းသင်တန်းတက်ပြီး ရှစ်တန်းအခန်းတွင် ကျောင်းပျက်များသူဖြစ်သည်။ သိုင်းပြိုင်ပွဲအတွက် အာရုံများသူဖြစ်သည်။ စာညံ့မည်စိုး၍ သိုင်းသင်တန်းကိုချည်း ဦးစားမပေးရန် ဆရာမများက ပြောပါသည်။
နောက်တယောက်မှာ လည်း ရှစ်တန်းအတန်းဖော်ဖြစ်ပါသည်။ သူက တာတိုအပြေးသမားဖြစ်ပါသည်။ ကိုးတန်းရောက်မှ ထိုအတန်းဖော်မှာ အပြေးသမားဖြစ်ကြောင်းသိရပါသည်။ အထက်တန်းကျောင်းရှိ ကာယနည်းပြဆရာမက သူ့ကို လာပြောမှ သိရခြင်းဖြစ်သည်။ အပြေးပြိုင်ပွဲဝင်ဖို့ လာပြောခြင်းဖြစ်သည်။ ဆုရပုံပေါ်ပါသည်။
နောက်ဆုံးတယောက်မှာ ကိုးတန်းရောက်မှ သတိထားမိသူတယောက်ဖြစ်ပါသည်။ သူက အတန်းထဲတွင် တခြားသူများနှင့် သိပ်ပြီးရောရောနှောနှော မနေသည့်ပုံစံဖြစ်သည်။ ဆယ်တန်းပြီး၍ ပြန်တွေ့သည့်အခါ ကာယဗလကစားသမားတစ်ယောက်ကဲ့သို့ ကိုယ်နေဟန်ထားဖြစ်နေပါသည်။
ပြန်ချုပ်ရသော် ကျောင်းသားဘဝ လူငယ်ဘဝတွင် အားကစားတခုခု သို့မဟုတ် တခုထက်ပိုသော ကစားနည်းတခုခုကို ကစားမိခဲ့ကောင်း ကစားမိခဲ့ကြပါလိမ့်မည်။ ထိုသို့ ကစားခဲ့ရာတွင် အပျော်ကစားခြင်းမျိုး မဟုတ်ဘဲ နည်းစနစ်ကျကျ မှန်ကန်စွာ ကစားတတ်ခဲ့ဖို့ လေ့လာခဲ့ဖို့ လိုပါသည်။ ထိုသို့ ကစားနိုင်ရန် မည်သူက လုပ်ပေးရမည်နည်းဆိုသည်ကို မသိပါ။ ထို့ကြောင့် တခုခုရစေရန် ယခုစာကို ရေးပါသည်။ လောလောဆယ်ဆယ်တွင် နေ့တိုင်း လမ်းလျှောက်ဖြစ်ရန် ကြိုးစားနေဆဲ အခြေအနေဖြစ်ပါသည်။
ကျော်မောင်(တိုင်းတာရေး)
၁၂-မေ-၂၀၂၂
(နောက်ဆက်တွဲရရင်ဖြင့် လက်ရှိမှာ သာမိုမီတာကနေ ၃၇.၄ မှ ၃၇.၈ ကြား တက်လိုက်ကျလိုက် ကစားနေသည်ကိုသာ ထိုင်ကြည့်နေရသည့် အခြေအနေဖြစ်နေပါကြောင်း)
၁၁-မေ-၂၀၂၃
Feb 15, 2023
ပဉ္စလက်ကတ် - ကျော်မောင်(တိုင်းတာရေး)
တခုခုရှိတယ်လို့ ကြားလိုက်တယ်။ အဲဒါနဲ့ သေသေချာချာပြန်ကြည့်တယ်။ ကြည့်နေတဲ့အခိုက်မှာ အဖေက ဘေးကနေ ပြောပေးတယ်။
"အခု ကြည့်နေတဲ့ပုံထဲမှာ ပုံတစ်ပုံရှိတယ်။ အဲဒီပုံ မြင်လာအောင် ကြည့်ရမှာ"
သူပြောတဲ့စကားမှာ ပုံတစ်ပုံရှိတယ်ဆိုတာပါတယ်။ ဟုတ်ပြီ၊ အဲဒီပုံတစ်ပုံမြင်အောင် ကြည့်ရမယ်။
"ဒီဘာမှန်းမသိတဲ့ပုံတွေထဲမှာ ပုံတစ်ပုံရှိနေတာလား၊ အဖေက အဲဒါမြင်ရလား"
"အေး ဟုတ်တယ်၊ ငါမြင်ပြီးသွားပြီ၊ မင်း ကြည့်လို့ရ မရ ငါသိချင်တယ်"
သူက မြင်ပြီးသွားပြီလို့ ပြောတဲ့အခါ ကိုယ်က မြင်အောင်ကြည့်ဖို့ပဲလိုတယ်ဆိုတာ နားလည်သွားတယ်။ အကယ်၍များ ငါတော့ မမြင်သေးဘူး၊ မင်းများ မြင်မလား ကြည့်ကြည့်ကွာဆိုရင် နည်းနည်းတော့ တွန့်ဆုတ်မိမှာ အမှန်ပဲ။ ဒါမှမဟုတ်လည်း သူမမြင်ပေမယ့် ငါတော့ မြင်နိုင်ရင် မြင်နိုင်တာပဲလို့ ယူဆပြီး ပိုကြိုးစားကြည့်ရင်လည်း ကြည့်မှာပဲ။
အခုလို အဖေက ငါတော့ မြင်ပြီးသွားပြီ၊ မင်း မြင်အောင် ကြည့်လို့ တိုက်တွန်းတဲ့အခါ ပုံကားချပ်ကို လက်နဲ့ကိုင် မျက်စိရှေ့မှာ ရှေ့တိုးနောက်ငင် လုပ်ပြီး ကြည့်ရပြန်ပါတယ်။ ဒီလိုနဲ့ မိနစ်အနည်းငယ်အကြာမှာ "ဟာ တွေ့ပြီ၊ တွေ့ပြီ"လို့ ဝမ်းသာအားရ ထအော်လိုက်ပါတယ်။ Archimedes လို ရေချိုးဇလုံထဲကနေ "Eureka" လို့အော်ပြီး ထပြေးတာ မဟုတ်ပါ၊ ထိုင်နေရင်း ကြည့်တာဖြစ်လို့ မတ်တပ်ရပ်ပြီး ထအော်ရုံအော်လိုက်တယ်ပဲဆိုပါစို့။
"ဘာပုံတွေ့လဲ" မေးတဲ့အခါ တွေ့တဲ့ပုံကို ဘယ်သို့ဘယ်ပုံဆိုတာ ပြောပြလိုက်ပါတယ်။
"ကဲ ထပ်ကြည့်ဦးကွာ၊ ပြန်တွေ့ရသေးလား"
ပုံကို ပြန်ကြည့်တဲ့အခါ ပုံက ပျောက်နေတယ်။ ဒါပေမယ့်လည်း တခါတွေ့ဖူးပြီးသား ပုံဖြစ်တဲ့အတွက် ခဏအကြာမှာပဲ လုံးကြွတက်လာတဲ့ပုံကို ပြန်တွေ့ရပါတယ်။
"ပြန်တွေ့ပြီခင်ဗျ"
အဖေက မေးပါတယ်
"ပုံမြင်ရအောင် ဘယ်လိုကြည့်လဲ"
"သေသေချာချာ စိုက်ကြည့်လေ မတွေ့ရလေပဲ၊ အဲဒီတော့ ရီဝေဝေမျက်လုံးအနေအထားနဲ့ အလယ်တည့်တည့်ကို ကြည့်ကြည့်မှတွေ့တယ်"
အဖေက "ရီဝေဝေမျက်လုံးအနေအထား" ဆိုတဲ့စကားကို သဘောကျလို့ထင်ပါတယ်၊ ရယ်နေပါတယ်။
ဒီအဖြစ်အပျက်လေးက ဟိုးတုန်းက ဖြစ်ပျက်ခဲ့တာ။ ၂၀၂၃ မရောက်ခင် မနေ့ညမှာ ဒါကိုပြန်အမှတ်ရမိပြီး အင်တာနက်ထဲ လိုက်ရှာကြည့်ပါတယ်။ "magic eye pictures" "Autostereogram" ဆိုတာ သွားတွေ့မိတယ်။ နည်းနည်းဖတ်ကြည့်တဲ့အခါ သူ့မှာ အဲဒီရုပ်ပုံကားချပ်တွေကို ကြည့်တဲ့နည်းရှိတယ်ဆိုတာ လေ့လာရပါတယ်။ ကြည့်ခဲ့ရတုန်းမှာ ကြည့်တဲ့နည်းဆိုတာနဲ့ ကြည့်ခဲ့တာမဟုတ်ပါဘူး။ "ငါတော့ မြင်ပြီးသွားပြီ" ဆိုတဲ့ စကားတခွန်းအပေါ်အမှီပြုပြီး မြင်အောင် ကြည့်ရတာပါပဲ။
ဒီအဖြစ်အပျက်လေး ခေါင်းထဲပေါ်လာတာက တခြားတခုကို စဉ်းစားလေ့လာနေရင်း ပေါ်လာတာဖြစ်ပါတယ်။ တခြားတခုဆိုတာက အသိဉာဏ်ပညာပိုင်းနဲ့ဆိုင်တဲ့အပိုင်းပါ။ အသိဉာဏ်ပညာသည် ထိုထိုအသိဉာဏ်ပညာကို လေ့လာနည်း သင်ယူနည်းကို မသိဘဲနဲ့ ရရှိနိင်သလားဆိုတဲ့ မေးခွန်းပါ။
အသိဉာဏ်ပညာလို နက်နက်နဲနဲရှိတာကို autostereogram ပုံကားချပ်ပုံစံနဲ့ ခိုင်းနှိုင်းရတာ အမှန်တကယ်တော့ မသင့်လှပါ။ ဒါပေမယ့်လည်း တခုခုများ ပတ်သက်ချက်ရှိနေသလားဆိုပြီး ဇဝေဇဝါဖြစ်မိပါတယ်။
၂၀၂၃ နှစ်စမှာ စားမိတာလေးဖြစ်ပါတယ်။ အများစားဖို့ မျှဝေလိုက်ရပါတယ်။ ဖြည်းဖြည်းစားကြပါ။
၁-၁-၂၀၂၃
ပုံပြောသူတဦး၏ မှတ်စုများ (၁)
မအိပ်ခင် ပုံပြောပြလို့ ဆိုတာနဲ့ ပုံပြောသူဟာ သူ့ရဲ့ ရှုပ်ထွေးလှတဲ့ ဦးနှောက်အကန့်တွေထဲမှာ သိမ်းထားခဲ့ဖူးတဲ့ သူကြားဖူးခဲ့တဲ့ ပုံပြင်တွေ၊ သူဖတ်ခဲ့ဖူးတဲ့ ပုံတိုပတ်စတွေကို ဆံပင်နက်တွေကြားထဲက ဆံပင်ဖြူငုတ်တိုလေးကို မွေးညှပ်နဲ့ ဆွဲနှုတ်ရသလို ဟိုတစ ဒီတစနဲ့ ခက်ခက်ခဲခဲ ဆွဲထုတ်ရင်း ဘယ်ပုံပြင်ကို အရင်ပြောပြရင် ကောင်းမလဲလို့ စဥ်းစားရတာဟာ ညတိုင်းပဲပေါ့။
စပြောမယ်လို့ ပြင်ခိုက်မှာပဲ နားထောင်မယ့်သူက ပုံပြင်အသစ်ပြောပြနော်၊ အဟောင်းတွေ နားမထောင်ချင်ဘူးလို့ တီတီတာတာ သတိပေးသံကြောင့် ရွေးထားတဲ့အပုဒ်ဟာ ပြောဖူးပြီးသားလား မပြောရသေးဘူးလားဆိုတာကို ပြန်လည်တွေးတောစိစစ်ယူရတာလည်း ပုံပြောသူအတွက် ကြိုမရှုပ်အောင် အပိုလုပ်ရတဲ့ လုပ်ငန်းစဉ်တခုပေပေါ့။ ကြိုမရှုပ်အောင် ဆိုတာက ဒီလို။ ပြောဖူးပြီးသားကို အတည်ပေါက်နဲ့ ထပ်ပြောဖို့ ကြိုးစားလို့ကတော့ အဲဒီညဟာ ပုံပြင်နားထောင်သူ ပရိသတ်လေးအတွက် ရကောက်နဲ့ ရစ်တဲ့ ညလေးအဖြစ် ပြောင်းလဲသွားနိုင်လို့ပါပဲ။
ဒါတွေကို ကြုံဖူးတဲ့အတွက် အရစ်မခံရအောင် ပုံပြင်အသစ်တွေဖတ်ရင်း ပုံပြောသူမှာလည်း ပုံပြင်ပြည့်ဝ စကားကြွယ်ဝတဲ့သူ ဖြစ်မှန်းမသိ ဖြစ်လာတာ ဘယ်သူပြောပြော မပြောပြော တဦးတည်းသော ပုံနားထောင်သူ ပရိသတ်ရဲ့ ချီးကျူးအားပေးခြင်းကို ရရှိတာကြောင့် တိုးတက်မှုမလျော့ပါးလေအောင် နေ့စဉ်လိုလို ပုံပြင်ဖတ်တဲ့ အမှုကို မှန်မှန်ကန်ကန်ပြုကျင့်ရပါတယ်။
ဒီညမှာလည်း အိပ်ခါနီးမှာ ပုံပြောပြဖို့ တောင်းဆိုပါတယ်။ ပုံပြောသူအတွက်ကလည်း ဒီလိုတောင်းဆိုမှုမျိုးကို မျှော်လင့်နေတာကြောင့်၊ မျှော်လင့်ဆို ဘယ်ပုံပြင်ကို ပြောပြရင် ကောင်းမလဲဆိုတာ ညစာစားနေရင်းနဲ့ ပထမထမင်းလုတ် ပါးစပ်ထဲမရောက်ခင်မှာကို အကန့်ထဲကနေ ရွေးထုတ်ပြီးသား ဖြစ်တာကြောင့် ရွေးပြီးသား ပုံပြင်လေး ပျောက်သွားမှာစိုးတာကြောင့်ပုံပြောပြဖို့ မြန်မြန်ဆန်ဆန်ပဲ ခြေဆင်းလိုက်ရပါတယ်။
သီချင်းတွေမှာပဲ ခြေဆင်းရှိတယ် မထင်ပါနဲ့။ ပုံပြင်မှာလည်း ခြေဆင်းရှိပါတယ်။ ပုံပြင်အတွက် ခြေဆင်းကတော့ ပုံပြင်ထဲမှာ ပါလာမယ့် ဇာတ်ကောင်တွေကို နားထောင်သူအတွက် အရင်ဦးဆုံး မိတ်ဆက်ပေးထားရတာပါပဲ။ အခုည ပြောမယ့် ပုံပြင်ထဲမှာပါမယ့် ဘီလူးဆိုတာက အဓိကဇာတ်ကောင်တစ်ကောင် ဖြစ်တော့ ပရိသတ်ကို ဘီလူးဆိုတာ ဘာလဲဆိုတာ ပြန်ပြီး နိဒါန်းပျိုးလိုက်ရတယ်။ အဲဒီလို အစွယ်ရှိတဲ့ ဘီလူးတွေရှိပေမယ့် အခုပုံပြင်ထဲက ဘီလူးကတော့ အစွယ်မပါဘူးကွယ့်။ ဒါနဲ့ အစွယ်မပါတဲ့ ဘီလူးဆိုတာ မြင်ဖူးသလားလို့ မေးကြည့်တော့ အရုပ်ထုတဲ့သူက အစွယ်မေ့ခဲ့လို့ ဖြစ်မှာပေါ့တဲ့။
ပုံတွေ ညတိုင်းပြောနေရတာ၊ တခါမှလည်း ပုံပြင်ဆုံးတဲ့အထိ နားထောင်တာ မတွေ့ဘူး၊ ပုံပြင်မပြီးသေးဘူး၊ ရှူး ရှဲ နဲ့ အိပ်တာပဲ ဆိုတော့ ပုံပြင်နားထောင်တဲ့ ပရိသတ်ဆီက ဒီလို တုံ့ပြန်ပါတယ်။
'အိပ်မက်ထဲမှာ ဆက်နားထောင်မယ်လေ' တဲ့။
တကယ်လည်း အိပ်မက်ထဲမှာ ဆက်နားထောင်နေပုံပါပဲ။ ပုံပြင်က အစပိုင်းပဲရှိသေး၊ အိပ်ပါလေရော။ ဒါကို ပုံပြောသူကလည်း သူ့ရဲ့ ပုံပြင်ပြောဟောနည်း အစွမ်းကြောင့်လို့ သူ့ကိုယ်သူ ဂုဏ်ယူလေ့ရှိပါတယ်။ ပုံပြင်ကို တုံးတိကြီး မဖြတ်ရက်လို့၊ မဖြတ်ရက်လို့ဆိုတာကလည်း ပုံတပုံထဲမှာ ပုံပြောကောင်းတဲ့ ဘုရင်ကြီးဟာ ပုံပြောနေတုန်း ဆက်မပြောနိုင်ဘဲ အိပ်ပျော်သွားတယ်လို့ ပါတယ်။ အဲဒီအခါ သူ့ပုံပြင်ကို လေလှိုင်းရှည်နဲ့ နားထောင်နေတဲ့ နတ်မင်းတွေ စိတ်ဆိုးပြီး ကျိန်စာတိုက်ကြသတဲ့။ ဒီပုံပြင်လေး ကြားဖူးထားတော့ ဟုတ်တာ မဟုတ်တာ ကိုယ့်အလုပ်မဟုတ်၊ ပုံဆိုတာ စပြောမိရင် အဆုံးထိရောက်အောင်ပြောရမယ် ဆိုပြီး စိတ်က ပိုင်းဖြတ်ထားလေတော့ ပြီးအောင် ဆက်ပြောနေမိတာပါပဲ။
အိပ်မက်ထဲမှာ ဆက်နားထောင်နေတဲ့အတွက် နောက်တနေ့ညကျ ပုံပြင်အသစ် ထပ်ပြောရမှာ ဖြစ်ပါတယ်။ ပုံပြင်အသစ်တွေကလည်း သူ့အကြောင်းပြောပါ ငါ့အကြောင်းပြောပါနဲ့ သူ့ထက်ငါ တိုးဝှေ့လို့ပေါ့။
ကျော်မောင်(တိုင်းတာရေး)
၁၄-ဇန်နဝါရီ-၂၀၁၉
မှတ်ချက်။ ။ အသစ်မရေးနိုင်သေးတဲ့အချိန် တက်လာတဲ့အဟောင်းလေးကိုပဲ နည်းနည်းပေါင်းသင်ပြီး ပြန်တင်ပါတယ်။ ကိုယ်ရေးထားတာ ကိုယ်ဖာသာ ပြန်ဖတ်ကြည့်တော့ ဟောင်းနေပေမယ့် ကောင်းနေဆဲရှိပါတယ်။ ပုံပြင်မပြောဖြစ်တာ ကြာပါပြီ။ ပြောဖို့ဆိုရင်လည်း ပုံပြင်တွေ ထပ်ဖတ်ရမှာပါ။ ဘယ်သူတွေများ ပုံပြင်အသစ်တွေ ရေးဖြစ်ကြပါလိမ့်။
Subscribe to:
Posts (Atom)