ဘော ဆိုသည့်အခါ B for Ball ဟူ၍ အသံကျယ်ကျယ်ဆိုခဲ့တာ သတိရမိသည်။ သည်က စ၍ ဘောကို သိခဲ့သည်ဆိုပါက မှားပေလိမ့်မည်။ B for Ball ဟု မဆိုခင်ကပင် ဘောလေးကန်လိုက်ပါဦးကွ အဲဒီဘောလေး လှိမ့်လိုက်စမ်းပါဦးကွ ဆိုပြီး လမ်းလျှောက်တတ်လာစ ကလေးငယ်ကို ဘောနဲ့ ကစားစေကြသည်။ အထူးသဖြင့် သားယောကျ်ားလေးများကို ဘောနဲ့ကစားခိုင်းကြသည်။ သမီးလေးရေ အဲဒီက ဘောလေး ကန်လိုက်စမ်းပါဟု မပြော၊ အဲဒီက ဘောလေးပုတ်ထုတ်လိုက်စမ်းပါဟု ပြောကြသည်။ ထို့ကြောင့် ဖြစ်မည်၊ ယောကျ်ားလေးများက ဘောတွေ့တာနဲ့ ခြေထောက်သုံးပြီး ကန်မည်ဆိုသည်က များပြီး မိန်းကလေးများကမူ ဘောတွေ့တာနဲ့ ပုတ်ထုတ်ကြသူက များလေသည်။
ဘောနဲ့ပတ်သက်သော ကစားနည်းများတွင် Ball Badminton ဆိုတာ သွားတွေ့ရသည်။ တဖက်တွင် ကစားသမားငါးဦးစီ ကစားကြသည့် ကစားနည်းဖြစ်သည်။ သေချာမလေ့လာအားသေးသောကြောင့် ball badminton အကြောင်း ခဏထားခွင့်ပြုပါ။
လုံးသောဘောဖြစ်သော ဘောလုံးကစားနည်းနှင့်ပတ်သက်ပြီး အဖေက မေးဖူးသည်မှာ ဘောလုံးကစားတာမှာ အခု ရှိတဲ့ဂိုးပေါက်တွေကို နည်းနည်းလောက်ချဲ့လိုက်ရင် ဘယ်လိုဖြစ်သွားမလဲဟု ဖြစ်သည်။
ကောင်းတယ် အဖေ၊ ခြင်းပေါက်ကြီးထဲ ဘောတွေပစ်ပစ်ထည့်ကစားတဲ့ ဟိုကစားနည်းလို တဒိုင်းဒိုင်းနဲ့ သွင်းလိုက်ကြမယ့်ဂိုးတွေဟု အားပါးတရဖြေတော့၊ မဟုတ်ဘူးကွ မင်း အခုလေ့လာကြည့်လေ၊ အသင်းနှစ်သင်းညီနေရင် ဂိုးရဖို့ ခက်တယ်၊ ပြိုင်ပွဲကြီးတွေမှာဆို ဂိုးပေါက်ပိတ်ပြီး ကစားနေကြတာ၊ ပွဲကြည့်သူက ဂိုး ဂိုး ဆိုင်္ပြီး အော်ဟစ်အားပေးရတာ ကြိုက်တယ်ကွ။ တဖက်နဲ့တဖက် အပြန်အလှန်သွင်းနိုင်အောင် ဂိုးပေါက်နည်းနည်းချဲ့ရမယ်ဟု ပြောပါသည်။
သူက သင်္ချာအတွက်အချက်သမားဖြစ်သောကြောင့် သေချာတွက်ချက်လေ့လာပြီး ပြောပုံရသည်။ ဘယ်လောက်လောက် ချဲ့ရင် ရမလဲဆိုတာ ဆက်မဆွေးနွေးမိ။ ဒါကို ဖီဖာသို့ မတင်ပြမီ ဂိုးပေါက်ချဲ့ရေးအတွက် နီးစပ်ရာ အမာခံဘောပရိသတ်များထံမှ သဘောထားတောင်းခံဖို့ ရှိသည်။ သူတို့ကတော့ ဟကောင်ရာ တိုက်စစ်မှူးတွေ ဒီလောက် ဂိုးသွင်းနိုင်နေတာ မသိရော့လေသလား၊ ငါတို့က ဂိုးပေါက်တောင်ကျဉ်းစေချင်ကြတာဟု ဆိုချင်ဆိုပါလိမ့်မည်။
မှတ်မှတ်ရရ ကြည့်ခဲ့ဖူးသော ဘောပွဲနှစ်ပွဲရှိပါသည်။ သားတို့လိုက်ခဲ့ကွာဟု အဖေကခေါ်သောကြောင့် ညီအစ်ကိုနှစ်ယောက် သုဝဏ္ဏကွင်းသို့ ပထမဆုံးအကြိမ်ရောက်ဖူးခဲ့သည်။ နောက်ပိုင်းလည်း မရောက်ဖူးပါ။ ကြည့်မယ့်ကြည့်တော့လည်း အပေါ်အဆင့်မြင့်မြင့်မှ ကြည့်ရသည်။ အောက်တွင် လူပြည့်နေသောကြောင့်မဟုတ်ပါ။ တက်ရင်းတက်ရင်း အပေါ်ဆုံးသို့ ရောက်သွားသည့်သဘောမျိုးဖြစ်သည်။ ဘောလုံးကိုတောင် ဘယ်မှာလဲဟု လိုက်ရှာနေရသည်။ ကစားသမားများကား လှုပ်နေသည်သာ မြင်ရသည်။ အားပေးသောဘက်မှအသင်း အကြီးအကျယ်ရှုံးပါသည်။ နိုင်ပါက သူတို့ကိုအားကျပြီး ဘောသမားဖြစ်ခဲ့ကောင်း ဖြစ်ခဲ့ပေမည်။ ရှုံးအောင်ကန်သည့်အတွက် ကျေးဇူးတင်ရမလိုဖြစ်နေသည်။
နောက်တပွဲက အောင်ဆန်းကွင်းမှာ ဖြစ်သည်။ ဦးလေးက တူကြီးလာ ဘောပွဲဝင်ကြည့်မယ်ဟု ပြောပြီးလက်မှတ်ဖြတ်ကာ ရှောင်တခင် ဝင်ကြည့်ဖြစ်သည့်ပွဲဖြစ်သည်။
သူက ဘောပွဲကြည့်ချင်လို့မဟုတ်၊ လူတယောက်ကို တွေ့လိုတွေ့ငြား ဘောပွဲတွင် လာရှာခြင်းဖြစ်သည်။ ဘောလုံးလောင်းကြသည့် ပွဲကြည့်စင်ရှိရာဖက်ကို သွားကြသည်။ ပွဲက စနေပြီ။ဘယ်အသင်းနဲ့ ဘယ်အသင်းကန်နေလဲဆိုတာ သိချင်သောကြောင့် ဦးလေးသွားရာနောက်လိုက်နေရင်း ကြည့်မိသညိ။ ဝန်ကြီးဌာန အမျိုးသမီးဘောလုဲးဗိုလ်လုပွဲ ဖြစ်လေသည်။
လောင်းကြေးများ သူလောင်း ကိုယ်လောင်းဖြင့် မကြားဖူးသည့် အသုံးအနှုန်းများကို ကြားရသည်။ မှတ်မိသည်မှာ ထိုပွဲတွင် အနိုင်ရသွားသည့် အသင်းမှ ဂိုးမကြာခဏသွင်းသည့် တိုက်စစ်မှူး(မ)သည် လောင်းကြေးရှုံးသည့်ဘက်မှ မကျေမနပ်အော်ဟစ်ခြင်းကိုခံရသည်။ ဦးလေးလည်း သူရှာနေသောလူကိုတွေ့ပြီး အနားခေါ်ကာ ဆူညံနေသောပတ်ဝန်းကျင်တွင် ဆုံးမစကားပြောနေသည်။ အားရအောင် ပြောပြီးသောအခါ လာ တူကြီး ငါတို့ ပြန်မယ်ဟု ထပြန်ကြသည်။ ပွဲက မပြီးသေး။
နောက်တနေ့သတင်းစာတွင် အားကစားသတင်းကို ပြပြီး ဒါ သားတို့သွားကြည့်ခဲ့တဲ့ပွဲဟု အိမ်ကလူတွေကို ကြွားခွင့်ရသည်။
ဒီညတော့ ဘောအကြောင်း မိတ်ဆက် ဖတ်ပြီး အိပ်စက်ကြဖို့ တောင်းပန်ပါရစေ။ အိပ်မက်ထဲ ဘောတဒိုင်းဒိုင်းကန်နေကြပါလျှင် ရေးရသော လက်ချောင်းလေးများ ပင်ပန်းရတာ တန်ပါလိမ့်မည်။
၂၃-ဩဂုတ်-၂၀၂၁