Go the extra mile

မနက်က တနေရာကို သွားပါတယ်။ သွားမယ့်နေရာကိုလည်း ဘယ်လိုမျိုး လာရမယ်ဆိုတာ လမ်းညွှန်ချက်ပေးထားတာ ရှိတယ်။ ဘယ်ဂိတ်ကနေလာရင် ဘယ်လိုလမ်းလျှောက်ပြီးလာ ဆိုပြီး လမ်းကြောင်းမြေပုံပေးထားပြီးသားဖြစ်တယ်။ သွားရမယ့်နေရာကို လွန်ခဲ့သော (၁၂)နှစ်တိတိက နှစ်ခါလောက် လမ်းလျှောက်ထွက်ရင်း ရောက်ခဲ့ဖူးတယ်။

မစိမ်းဘူး ဆိုပါစို့။

ဒါနဲ့ပဲ ဆင်းရမယ့်မှတ်တိုင်ရောက်တော့ ဆင်းတယ်။ မှတ်တိုင်ကနေ သွားရမယ့်ဂိတ်ဝင်ပေါက်ကို ရှာကြည့်တယ်။ ဝင်ပေါက်ရှိတဲ့လမ်းဟာ လောလောဆယ်မှာ ဆောက်လုပ်ရေးလုပ်ငန်းခွင်တွေရှိနေတဲ့အတွက်ရယ် ပတ်ဝန်းကျင်မှာ အဆောက်အအုံတချို့တိုးပွားလာပုံရတဲ့အတွက်ရယ်ကြောင့်

ဟိုးတုန်းကနဲ့မတူဘဲ ပြောင်းလဲနေတယ်။ ဝင်ပေါက်ရှာနေတဲ့အခါမှာ စီးလာတဲ့ကားပေါ်က ဆင်းသွားတဲ့ခရီးသည်တချို့သွားတဲ့ဘက်ကို ကြည့်လိုက်တယ်။

သူတို့က ဘယ်သွားနေတာလဲ။

တွေ့ပြီ ဝင်ပေါက်။

ဝင်ပေါက်ကနေ သွားရမယ့်နေရာကို အီးမေးလ်ကနေ ပို့ပေးထားတဲ့လမ်းညွှန်မြေပုံအတိုင်းကြည့်ပြီး သွားရင် အဆင်ပြေနိုင်တယ်။

အဆောက်အအုံတချို့ရှိတဲ့အတွက် သွားရမယ့်နေရာကို လှမ်းမမြင်ရ။ အဲဒါနဲ့ ရှေ့ကလာနေတဲ့ လူတယောက်ကို မေးလိုက်ပါတယ်။

သူက အဲဒီမှာ သန့်ရှင်းရေးလုပ်နေပုံရပါတယ်။ လက်ထဲမှာ တံမြက်စည်းရှည်လိုမျိုး ကိုင်ထားတယ်။ သွားချင်တဲ့နေရာကို ပြောလိုက်တယ်။ လမ်းညွှန်ပါလို့ မေးလိုက်တာပါ။ သူက တံမြက်စည်းကို ချလိုက်ရင်း သူလိုက်ပြပါမယ်ပြောတယ်။ သူ့နောက်ကနေ လိုက်သွားတယ်။

လမ်းပြပေးတဲ့သူဟာ သွားချင်တဲ့နေရာအထိကိုရောက်အောင် လိုက်ပို့ပေးမယ့်ပုံစံရှိပါတယ်။ သွားချင်တဲ့နေရာကို လှမ်းမြင်ရတဲ့အခါ သွားချင်တာ အဲဒီနေရာပဲလို့ပြောလိုက်ပါတယ်။ လိုက်ပြပေးတဲ့သူက ဆက်ပြီး ပို့ပေးမယ့်ပုံစံရှိပါတယ်။ ဆက်ပြီး သွားလိုက်တော့မယ်၊ ကျေးဇူးတင်ပါတယ် ပြောတဲ့အခါ တည့်တည့်လျှောက် ဘယ်ဖက်ချိုးလိုက်လို့ ဆက်ပြီး လမ်းညွှန်လိုက်ပါသေးတယ်။

သွားမယ့်နေရာကို လမ်းလျှောက်နေရင်း တွေးမိပါတယ်။ သူသည် တံမြက်စည်းလှဲနေတယ်။ စေတနာ့ဝန်ထမ်းလည်း ဖြစ်နိုင်တယ်။ လာနေကျ လူလည်း ဖြစ်နိုင်တယ်။ လမ်းညွှန်ပေးပါလို့ ပြောတဲ့အခါ လူကိုယ်တိုင် လိုက်ပြပေးတယ်။ မေးလိုက်တဲ့လူကိုယ်တိုင် အားနာရတဲ့အဖြစ်ပါ။

Go the extra mile.

လှေကားတွေအတိုင်းတက်သွား၊ တည့်တည့်လျှောက် ပြီးရင် ညာကွေ့၊ နောက်တခါ တည့်တည့်လျှောက်၊ ဘယ်နေရာမှာတော့ ဘယ်ဖက်ကို ကွေ့လိုက်တော့ ရောက်လိမ့်မယ်လို့ လမ်းမညွှန်ပါ။

သူနဲ့လိုက်ခဲ့၊ သွားချင်တဲ့နေရာကို မြင်ရတဲ့အထိ ပြပေးလိုက်တယ်။

ကြည်နူးခြင်း ဖြစ်ရတဲ့စိတ်ဟာ တနေ့လုံးအထိ ဖြစ်ပါတယ်။

တံမြက်စည်းလှဲနေတဲ့အလုပ်ကို ခဏပစ်ထားပြီး နေရာအထိတွေ့အောင် လမ်းပြပေးလိုက်တာပါပဲ။

ဒီလိုအပြုအမူဟာ ပုံမှန်တွေးရင် ဘာမှ မပင်ပန်းတဲ့ကိစ္စ၊ ဘာမှ ကြီးကြီးကျယ်ကျယ်မဟုတ်တဲ့ကိုစ္စလို့ ထင်မြင်စရာပါပဲ။ ဒါက ဒီမနက်ကြုံရတဲ့ Go the extra mile ပါ။ အတော့်ကို ကျေးဇူးတင်စရာ ကောင်းတဲ့ကိစ္စပါ။

နောက်တခုက ပုံမှန်ကိစ္စလိုသဘောမျိုး မျှဝေတဲ့ကိစ္စ။

မိတ်ဆွေကောင်းရှိခြင်းနဲ့ပတ်သက်လို့ ပြောဟောတာတွေ ဖတ်ဖူးကြားဖူးကြပါလိမ့်မယ်။ ကိုယ်တိုင်သည် သူတပါးရဲ့ မိတ်ဆွေကောင်းဖြစ်ဖို့လိုသလို ကိုယ့်ဆီမှာလည်း မိတ်ဆွေကောင်းတွေရှိဖို့လိုအပ်တယ်ဆိုတာပါပဲ။

အများသုံးကြတဲ့ လူမှုကွန်ယက်မှာ မိတ်ဆွေတယောက်က ပွဲ ကြော်ငြာလေးတခု မျှဝေတယ်။ ဖတ်ကြည့်မိတယ်။

ဟာ ... ဒါကို စိတ်ဝင်စားတယ်၊ စိတ်ဝင်စားရုံမက ပွဲ မှာ လာမယ့်ပုဂ္ဂိုလ်နဲ့ ပတ်သက်သမျှကို Youtube မှာ ရှာကြည့်တယ်။ သိပ်တော်တော်များများမတွေ့မိပါ။ ဗီဒီယိုနှစ်ဖိုင်လောက်တွေ့တယ်။ နားထောင်ကြည့်တယ်။ သဘောကျတယ်။ အဲဒီပွဲကို သွားမယ်၊ စာရင်းပေးတယ်၊ ကြိုပြီး ခွင့်ယူတယ်။ ဒီနေ့မနက်က သွားတက်တယ်။

"သိသူ ဖော်စား၊ မသိသူ ကျော်သွား" ဆိုတာလို ဖြစ်ပါတယ်။ သိချင်တာ သိခဲ့တယ်။ ဘာလုပ်ရမယ်ဆိုတာ သဘောပေါက်ခဲ့တယ်။

မျှဝေတာကတော့ ပုံမှန်သဘောမျိုး မျှဝေတာ ဖြစ်ကောင်းဖြစ်နိုင်လိမ့်မယ်။ မျှဝေတဲ့ပို့စ်မှာ မိတ်ဆွေတို့ ဒီပွဲကို သွားကြ၊ အလုပ်ရှိရင်လည်း ခွင့်ယူပြီးသွားကြ၊ ကိုယ်တိုင်နားလည်အောင်လုပ်ကြလို့ အတင်းကာရော တိုက်တွန်းထားတာမဟုတ်သော်လည်း သွားရောက်တဲ့အခါမှာ အဲဒီကြော်ငြာပို့စ်တခုလေးကြောင့် အကျိုးများသွားရပါတယ်။ လူကိုယ်တိုင်တွေ့တဲ့အခါမှာလည်း ကျေးဇူးတင်ကြောင်းပြောခဲ့ပါတယ်။

မိတ်ဆွေကောင်းရှိတဲ့ အကျိုးပါပဲ။

ကျော်မောင်(တိုင်းတာရေး)

၁၁-အောက်တိုဘာ-၂၀၂၄