ဆိုလို့များ

ပဲစားလေ့စားထရှိပေမယ့် မချက်တတ်။ ဟိုမေးဒီမေးနဲ့ တခါလောက် ချက်နည်းသိသွားရာကနေ အခုဆို သုံးခါမြောက်ချက်ဖြစ်ပါတော့မယ်။

ကုလားပဲဝါကို ရေညလုံးပေါက်စိမ်ရတယ်ဆိုလို့[၁]ရေစိမ်မယ်ကြံတယ်။ ဝယ်လာတဲ့ပဲထုပ်ကိုဖောက်မယ်ကြည့်တဲ့အခါ ပလတ်စတစ်အထုပ်ကို stapler နဲ့ တချက်ချုပ်ထားတာတွေတယ်။ ပုံမှန်အားဖြင့်ဒီလိုပဲထုပ်တွေကို အပူပေးပြီး လေလုံအောင်ပိတ်ထားကြတာများတယ်။ ဝယ်ခဲ့တဲ့ဆိုင်က မြန်အောင် stapler သုံးလိုက်တဲ့အခါ staple ကို ဂရုစိုက်ပြီးအထုပ်ကိုဖောက်ရတယ်။

Stapler ဆိုလို့[၂]ဒီကိရိယာလေးဟာ အရွယ်အစားမျိုးစုံရှိပြီး အသုံးဝင်နေတယ်။ သူ့အကြောင်းတခုတ်တရရေးပြထားကြတာကို ဖတ်ကြည့်ချင်မိတယ်။ ရုံးသုံး ကျောင်းသုံး အိမ်သုံး ဆေးရုံသုံးကနေ ဆိုင်သုံးအထိ သုံးနေရတယ်။ သူမရှိလည်း ရလားဆို ရတာပဲ။ မရှိမဖြစ်ပစ္စည်းတော့ မဟုတ်ပြန်ဘူး။ အင်း .. သူရှိရင်တော့ အတော်အဆင်ပြေတာ တွေ့ရပြန်တယ်။ သုံးစွဲနေသူတွေ ကြုံတတ်ကြလိမ့်မယ်။ ကိုယ်နှိပ်မယ့် အလှည့်ရောက်မှ ကုန်နေတာမျိုး။ အဲဒီလိုဖြစ်နေရင် staple လေးတွေ ထည့်ရတာက အလုပ်တလုပ်။ နှိပ်နေရင်း ကုန်သွားတဲ့အခါလည်း ရှိတတ်လိမ့်မယ်။ နှိပ်နေရင်း ကုန်သွားတယ်ဆိုလို့[၃] တခါမှာ အဲဒီလိုဖြစ်တဲ့အခါ အသစ်ထည့်ဖို့ကလည်း ပြတ်လပ်နေပြန်တယ်။ ဒီမှာကလည်း နှိပ်ကိုနှိပ်ချင်နေပြီ။ ဟိုရှာဒီရှာနဲ့ ဘယ်တုန်းက ဘယ်လိုဖြစ်ပြီး အံဆွဲထဲရောက်နေမှန်းမသိတဲ့ staple ဘူးသေးလေးတွေ့တာနဲ့ အားရဝမ်းသာသုံးမယ်ကြည့်တော့ staple တွေခမျာ သံချေးတက်နေတဲ့ staple တွေဖြစ်နေတယ်။

Stapler အကြောင်းနားလိုက်ပြီး ပဲထုပ်ဆီပြန်သွားရအောင်။ ပဲထုပ်မှာပါတဲ့ staple ကို သတိထားရတယ်။ သတိထားနေတဲ့ကြားထဲမှာ ကတ်ကြေးနဲ့ပလတ်စတစ်ကိုညှပ်ရင်း ဘယ်ကျသွားလဲမသိဖြစ်သွားတယ်။ ကတ်ကြေးဆိုလို့[၄] ကတ်ကြေးဆိုတာကလည်း ဘယ်ပဝေသဏီကတည်းက သုံးလာတဲ့ကိရိယာလည်း ဆိုတာ သိချင်မိတယ်။ သူလည်း အတော်အသုံးဝင်တဲ့ကိရိယာအသုံးအဆောင်ဖြစ်နေဆဲပဲ။

ကိရိယာအသုံးအဆောင်ဆိုလို့[၅] ဒီလို ကိရိယာမျိုးလေးတွေအကြောင်းရေးပြထားတဲ့ စာအုပ်တစ်အုပ်ဖတ်ခဲ့ဖူးတယ်။ “The Evolution of Useful Things” ဖြစ်ဖို့များတယ်။ ဒီလိုမျိုးစာအုပ်တွေ ဘာသာပြန်ဖတ်ရရင် အသုံးဝင်မှာပဲ။ ဘာသာပြန်ဆိုလို့[၆] အားကစားနဲ့ပတ်သက်တဲ့ ဘာသာပြန်စာအုပ်တွေရှားတယ်။

ဘယ်ကျသွားမှန်းမသိတဲ့ staple ကို အချိန်ပေးပြီးလိုက်ရှာနေသေးတယ်။ နောက်မှ staple တချောင်းဟာ ကြမ်းပြင်ပေါ်ကျနေလည်း ဘာမှမဖြစ်လောက်ပါဘူးရယ်လို့ပဲ စိတ်ထဲမှတ်ယူပြီး ပဲကိုရေစိမ်တဲ့အလုပ်ကြီးအကိုင်ကြီးကို အောင်မြင်စွာနဲ့ လုပ်ဆောင်နိုင်ခဲ့တယ်။

ဆိုလို့ ဘယ်နှစ်ခါများ စာထဲထည့်ရေးခဲ့မိပါလိမ့်။ အချိန်ရရင် အစက ပြန်ဖတ်ပေးပြီးကူရှာပေးပေါ့။ ရှာရလွယ်မှာပါ။

ကျော်မောင်(တိုင်းတာရေး)

၂-အောက်တိုဘာ-၂၀၂၁

၂-အောက်တိုဘာ-၂၀၂၄