စင်ကာပူမှာ စာကြည့်တိုက်တွေ ရှိတယ်။ ဒါကို သိသူများပါတယ်။ အခုစာကြည့်တိုက်တွေက ဟိုးတုန်းက စာကြည့်တိုက်တွေလို စာအုပ်ဖတ်ဖို့ ရည်ညွှန်းစာပေစာတမ်းတွေ ရှာဖွေဖို့တင်မဟုတ်တော့ဘဲ တခြားသော အရာများဖြစ်တဲ့ multimedia room တို့ study room တို့ programme room တို့ စတာတွေ ရှိကြတာဖြစ်တယ်။
စင်ကာပူမှာ လည်စရာ ပတ်စရာ အတော်ပေါပါတယ်။ မသွားဖူးတဲ့နေရာတွေ ရှိကြတယ်။ စာကြည့်တိုက်တွေကတော့ အရွယ်သုံးပါးသွားရင် သွားသူတွေရဲ့ဘဝတွေကို မြှင့်တင်ပေးမယ့် အထောက်အကူကောင်း ဖြစ်စေတဲ့ နေရာဌာနတွေ ဖြစ်တယ်။ အရွယ်သုံးပါး အသုံးပြုနိုင်အောင်လည်း ဆောင်ရွက်ထားကြတယ်။
နီးစပ်ရာ စာကြည့်တိုက်ကိုသွားပါ။ စာကြည့်တိုက်အသင်းဝင်ဖြစ်ဖို့ စာကြည့်တိုက်ဝန်ထမ်းတဦးဦးကို မေးပါ။ ဒီမှာ အလုပ်လုပ်နေတဲ့နိုင်ငံခြားသားတွေအတွက် အသင်းဝင်ကြေးကို တနှစ်စာအတွက် တခါတည်းပေးစရာမလိုတော့ဘဲ တလချင်း ကိုယ့်ရဲ့ဘဏ်ကတ်ထဲကနေ ပေးနိုင်ပါတယ်။ တလအတွက် ပေးရမယ့်ပမာဏဟာ ထမင်းတနပ်စာဖိုးလောက်ပဲ ရှိပါတယ်။ စာကြည့်တိုက်မှာ အသင်းဝင်ဖြစ်ဖို့ တခြားလိုအပ်တာတွေ မသိတာတွေ(စာအုပ်ဘယ်နှစ်အုပ်ငှါးနိုင်မလဲ၊ တခါငှါး ဘယ်နှစ်ရက်ရမလဲ စတာတွေ)ကို စာကြည့်တိုက်ဝန်ထမ်းတွေက ရှင်းပြပေးပါလိမ့်မယ်။ သေသေချာချာ မေးပါ။
လုပ်ရမှာက စာကြည့်တိုက်မှာ အသင်းဝင်ဖြစ်ပြီဆိုတာနဲ့ တပတ်တခေါက်လောက် စာကြည့်တိုက်သွားပြီး ဘဝတိုးတက်ရေးအတွက် လုပ်ကြည့်လိုက်ပါ။ စာကြည့်တိုက်အတွင်းမှာ လိုက်နာကျင့်သုံးရတဲ့ စည်းကမ်းမျိုးတွေကို လိုက်နာပါ။
တလ နှစ်လ သုံးလေးလဆိုရင် စာကြည့်တိုက်တွေကို ကောင်းမွန်စွာအသုံးပြုသူဟာ တခြားသူတွေထက် ခေါင်းတလုံးပိုမြင့်လာတာတွေ့ရလိမ့်မယ်။ ခေါင်းတလုံးပိုနိမ့်သွားတာလည်း ဖြစ်ကောင်းဖြစ်နိုင်ပါတယ်။ စာကြည့်တိုက်သွားတာဟာ လည်ပတ်ပြီး ပွါး၊ စကားတွေများ၊ တအားတွေစားကြတာထက် ပိုပျော်ဖို့ကောင်းတယ်ဆိုတာ သိသွားတဲ့အခါ တခြားသူတွေကိုလည်း ရရှိလာတဲ့ကောင်းကျိုးတွေ ပြောပြပြီး စာကြည့်တိုက်မန်ဘာဖြစ်အောင် ကူညီပေးလိုက်ပါ။
စာကြည့်တိုက်မှာ ဘယ်စာအုပ်တွေ ရှိလဲ ဖတ်ရမလဲလေ့လာရမလဲ ဆိုတာတွေနဲ့ပတ်သက်ပြီး ဆက်ရေးပါမယ်။
(စာကြွင်း - ခေါင်းတလုံးနိမ့်သွားတယ်ဆိုတာက မသိတာတွေ များပါလားဆိုပြီး မာန်ကျသွားတာကို ဆိုလိုပါတယ်)
ကျော်မောင်(တိုင်းတာရေး)