(၂)
ဇာတ်လမ်းက အပ်နဖားပေါက်ကနေ စသည်။
“မြေးရေ အဖွားကို ဒီအပ်ကြိုးလေး ထိုးပေးစမ်းပါ”
“အဖွားကြီး မင်းမျက်မှန် ပါဝါတွေတိုးနေပြီ”
“အဖိုးကြီးရယ် ရှင်ပဲ မျက်မှန်တပ်ဖို့ လုပ်ပါဦး၊ မဟုတ်ရင် အဖွားခိုင်းခါနီးတိုင်း စာဖတ်နေတဲ့ ငါ့မြေးကို အကူအညီတောင်းပါ့မလား”
မြေးဖြစ်သူက အဖိုးအဖွားနှစ်ယောက် အချေအတင်ဖြစ်နေကြသည်ကို ရယ်ကျဲကျဲလုပ်ရင်း ဖတ်လက်စစာအုပ်ကို အသာချကာ အဖွားဆီက အပ်နှင့်အပ်ချည်ကြိုးကို ယူလိုက်သည်။
“အဖွား ခွေးစာ သွားကျွေးလိုက်ဦးမယ်၊ ထိုးထားနှင့်”
ခွေးစာသွားကျွေးနေသော အဖွား ပြန်ရောက်လာသည်။
“ဟင် အခုထိ မရသေးဘူးလား”
“ဒီအပ်က အပေါက်ကျဉ်းတယ် အဖွားရဲ့”
“ဟေ့ အဖွားကြီး မင့်မြေးကို အပ်နဖားပေါက် ကြီးတဲ့ဟာ ရှာပေးလိုက်ဦး၊ တကတည်းကွာ အဖွားမှုန်နေလို့ မြေးတွေ အားကိုးကာမှ”
“အဲဒီလို ထိုးလို့ဘယ်ရမှာလဲ၊ ဒီမှာကြည့် အပ်ချည်ကြိုးအစကို မဖွာအောင် ဟောသလို အရင် လုပ်ရတယ်”
အစကို လျှာပေါ်တင်ရင်း ပြန်ထုတ်သည့်အခါ အပ်ချည်ကြိုးစမှာ ချွန်ချွန်လေးဖြစ်သွားပြီး အပ်ပေါက်သေးထဲ ထိုးဖို့ လွယ်ကူသွားသည်။
“မှောင်နေသေးရင် လင်းတဲ့နေရာသွားကွ” အဖိုးက လှမ်းပြောသည်။
“ရပြီ အဖိုး ရပြီ၊ ဒီမှာ ဝင်သွားပြီ။ ဟာ ဟ၊ ဒါ ပထမဆုံးအကြိမ် အပ်ပေါက်ထဲ ကြိုးထိုးရခြင်းပဲ” အားရဝမ်းသာစွာဖြင့် ပြောသော်
အဖိုးအဖွားနှစ်ဦးစလုံးက သူ့ကို တအံ့တဩကြည့်ရင်း
“ဟေ … မင်းတခါမှ အပ်နဖားမထိုးဖူးဘူးပေါ့”
“အဖိုးကြီးရယ် သူအပ်နဖားမထိုးဖူးတာကလဲ ရှင့်သမီး မျက်စိမမှုန်သေးလို့ဖြစ်မှာပေါ့၊ အကြီးမ လာမှ မေးရဦးမယ်၊ ငါ့သမီးကြီးလည်း လေးဆယ်ကျော်တော့မယ်၊ မျက်မှန်တော့ လုပ်ဦးလို့ ပြောရဦးမယ်၊ မမြင်မစမ်းနဲ့ အပ်နဖားထိုးနေပုံရတယ်”
တခါတွေ့ဖူးသည်က ကျောင်းနေဖက်သူငယ်ချင်းတယောက်၏ အဖွားမှာ မျက်မှန်လည်းမတပ်၊ နေ့အလင်းရောင်မှုန်ပြပြအခြေအနေတွင် အပ်နဖားကြိုးကို ကိုယ်တိုင်ထိုးနိုင်နေခြင်းပင်။ အိမ်မှာ ထိုအကြောင်းကို ပြောပြသည့်အခါ အဖေနဲ့အမေက မှတ်ချက်ပေးသည်။
“အဲဒီ အဖွားကြီးက ကံကောင်းတာပဲ၊ မင့်အမေဆို ငါကြည့်နေတာ ခုနောက်ပိုင်း သူအပ်နဖားထိုးရင် မျက်မှန်တပ်ထားတာတောင် အတော်ထိုးယူနေရတယ်”
အမေ မျက်မှန်စတပ်သည့်အခါ အဖွားမရှိတော့ပါ။ အဖွားကတော့ ငါ့သမီးကြီး မျက်စိမမှုန်သေးဟု ထင်ကောင်းထင်သွားနိုင်သည်။
အဖွားအား ကူကာ အပ်နဖားကြိုးကို သူ့ဘဝ၌ ပထမဆုံးအကြိမ်အဖြစ် အောင်မြင်စွာထိုးခဲ့သော ထိုလူငယ်လေးသည် နောင်နှစ်ပေါင်းများစွာ ကြာပြီးသည့်နောက် ဆိုရှယ်မီဒီယာပေါ်တွင် ဤသို့ ရေးပြီး တင်လေသည်။
ကိရိယာလွတ်
=========
“အပ်တချောင်း
ရောင်းရန်ရှိသည်။
နဖားကြိုး
တမိနစ်အတွင်း
ထိုးပြနိုင်သူ
အလကားရမည်။”
ကြာပေါ်
၂၈-မတ်-၂၆
အပ်နဖားကြိုးကို တမိနစ်အတွင်း ထိုးပြနိုင်သူ တရက်ကြာပြီးသည်အထိ မရှိ။ ထိုအကြောင်းကြောင့် မည်သူ့ကိုမျှ အပ်တချောင်း အလကားပေးရန်မလို။
ဤသို့ဖြင့် အပ်တချောင်းသည် ရောင်းကုန်လက်ကျန်အဖြစ် လက်ဝယ်တွင် ဆက်လက်တည်ရှိနေပါလေတော့သတည်း။
ကျော်မောင်(တိုင်းတာရေး)
၂၉-မတ်-၂၀၂၆
#ဆီမီးခွက်(၂)
No comments:
Post a Comment