တရေးလောက် နှပ်ဖို့ကြံရင်း မနက်က ဖတ်မိတဲ့ ဆောင်းပါးလေးတပုဒ်ကို အစအဆုံးပြန်ဖတ်မိတယ်။ ရေးထားတာတွေများစွာထဲက စစ်တမ်းတခုမှာပါတဲ့ အိပ်နှုန်းတွေကို သတိပြုမိတယ်။ စနေ တနင်္ဂနွေနေ့တွေမှာဆိုရင် ၆.၇ နာရီ (၆ နာရီ ၄၂ မိနစ်) အိပ်ကြပြီး ကျန်နေ့တွေမှာတော့ ၆.၃ နာရီ (၆ နာရီ ၁၈ မိနစ်) အိပ်ကြပါတယ်တဲ့။ ဒါက ဒီက နိုင်ငံသားတွေကို စစ်တမ်းကောက်ယူတဲ့အခါမှာ ရလာတဲ့ အချက်အလက်လို့ ရေးထားပါသေးတယ်။
ဆောင်းပါးအစမှာတွေ့ရတဲ့ Mar 15 ဟာ ဒီနှစ်ရဲ့ World Sleep Day ဆိုတာလေးတွေ့ရတော့ စိတ်၀င်စားမိပြန်ပါတယ်။
World Sleep Day ဆိုပါလား။
2019 အတွက် world sleep day ဆိုတာ ဒီနေ့မှာ ကျရောက်ပါတယ်တဲ့။ ဒီနှစ်ရဲ့ World Sleep Day slogan က "Healthy Sleep, Healthy Aging " လို့ဆိုပါတယ်။
အိပ်တာနဲ့ ပတ်သက်လို့ မှတ်မိတာလေးတွေမှာ ကားစီး လေယာဉ်ပျံစီး သင်္ဘောစီးပြီး ခရီးရှည်သွားတဲ့အခါ မအိပ်တတ်တဲ့သူတွေရှိကြသလို တချို့ကြပြန်တော့လည်း ခရီးသွားရင်း သီချင်းဆိုမယ်လို့ မကြွေးကြော်ဘဲ ခရီးစတာနဲ့ အပူအပင်ကင်းစွာနဲ့ အိပ်တတ်သူများလည်း ရှိကြပါတယ်။ ဒါက ခရီးသွားတဲ့အခါ အိပ်စက်ခြင်းဖြစ်ပါတယ်။
သိကျွမ်းခဲ့ဖူးတဲ့ ပုဂ္ဂိုလ်တယောက်ရဲ့ အိပ်ရာ၀င် အိပ်ရာထ အလေ့အကျင့်က ဒီလိုပါ။ ညဆို ဆယ်နာရီမခွဲခင် သန့်စင်ခန်း၀င် သွားတိုက်ပြုလုပ်ပြီး ဆယ်နာရီခွဲအတိမှာ အိပ်ပါတယ်။ မနက်ဆို ငါးနာရီခွဲတိတိမှာ နှိုးစက်အကူအညီနဲ့ ထပါတယ်။ ဒါဟာ သူရဲ့ ပုံမှန်အိပ်ချိန် ထချိန်ပါပဲ။ ၇ နာရီတိတိ အိပ်တယ်ဆိုပါစို့။ တီဗီက ဇာတ်လမ်းကောင်းတယ် လာကြည့်ပါလားဗျ ခေါ်လည်း အိပ်ရေးပျက်ခံပြီး မကြည့်ဘူးလို့ပဲ ပြောပါတယ်။
တချို့သူများဟာ နေ့လည်နေ့ခင်း ထမင်းစားပြီးလို့ အလုပ်ခဏနားချိန်လေးအတွင်းမှာ တရေးလောက်ရအောင် နှပ်တတ်ပါတယ်။ တရေးနှပ်ပြီးတဲ့အခါ အားအင်ပြည့်သွားသလို ရှိတတ်ပြီး ကျန်တဲ့ နေ့အချိန်ပိုင်းတွေမှာ တက်ကြွစွာနဲ့ ဖြတ်သန်းကြတာကို မြင်ဖူးပါတယ်။ နာရီ၀က်လောက် နှပ်လိုက်ရရင်ကိုပဲ အတော်လန်းသွားတဲ့ပုံပေါ်ပါတယ်။ ဒါကြောင့် အချိန်ရရင် တရေးနှပ်ဖို့ လိုအပ်ပါတယ်။
ကဲ တရေးနှပ်ကြပါစို့။
၁၅-မတ်-၂၀၁၉
(စာကြွင်း - ၂၀၂၃ အတွက်ကတော့ ၁၇ မတ် (သောကြာနေ့)ဟာ World Sleep Day ဖြစ်တယ်လို့တွေ့ရပါတယ်။ အမှန်က ကမ္ဘာကြီး အိပ်နေတာ ကြာပါပြီ)
World Sleep Day
